Su Gazetinu, 15 de freàrgiu de su 2021
Su Gazetinu
Aristanis, contraventziones – Sa Politzia est intervènnida s’àtera die a merie in Aristanis, in ue sunt acontèssidos unos cantos atropèllios de gente, prus che totu de pitzocheddos. E at postu unas binti contraventziones. Is politziotos ant cuntestadu a is giòvanos de no àere respetadu is normas anti-Covid 19, ma fintzas cussas de s’ordinàntzia comunale chi proibiat de bufare alcòlicos in logos pùblicos.
Furas – A una pitzoca de 29 annos dd’ant denuntziada is Carabineris pro ite ca dd’imputant is furas acontèssidas in is magasinos Lidl de Aristanis, Gùspini e Santu ‘Èngiu. A sa giòvana, chi est residente in Ùssana ma domitziliada in Ilartzi, dd’imputant su reatu de fura agravada e sighida.
Crabas, Gigantes – Su sìndigu de Crabas Andrea Abis rispondet a su ministru Franceschini a pustis de is asseguratziones suas in contu de su tempus benidore de is istàtuas de is Gigantes de Mont’’e Prama. Su sìndigu Abis cunfirmat: “S’acontzu ddu depent fàghere in Crabas e is istàtuas depent abarrare inoghe”. Sa Sovrintendèntzia, imbetzes, cheret fàghere s’acontzu in Casteddu.
Dannos pro more de su bentu – Allarme eris in Aristanis pro unu palu de sa lughe chi nd’est rutu a terra in bia de Gialeto pro more de su bentu. Pro sorte bona non s’est ingortu nemos. Ddoe sunt curtos is Vìgiles de su Fogu, chi ddis est tocadu a intervènnere fintzas in Crabas e in àteras biddas de sa provìntzia.
Lunis, 15 de freàrgiu de su 2021
commenta