Su Gazetinu, 8 de freàrgiu de su 2021
Su Gazetinu
Zona groga – Dae oe in Sardigna tocat a sighire is règulas de seguresa contras de s’isparghidura de su coronavirus prevìdidas pro is zonas classificadas in colore grogu. Intra de is àteras cosas, faghet a si transire a manera prus discansosa dae unu comune a s’àteru, is tzilleris torrant a abèrrere e fintzas is museos. Tocat però a si nde abarrare in domo dae is deghe de note a is chimbe de mangianu: in cussas oras faghet a essire dae domo isceti pro chistiones de traballu, de salude o de apretu mannu.
Camera de cummèrtziu – Sa sea de Aristanis de sa Càmera de cummèrtziu de Casteddu e Aristanis at publicadu un’agiornamentu in contu de s’impreu de is servìtzios de s’ente e de su funtzionamentu de is ufìtzios pro su pùblicu, cunditzionados dae s’emergèntzia coronavirus. S’agiornamentu si podet bìere in sa pàgina Internet www.or.camcom.it. Su vitze-presidente de s’Ente camerale Nando Faedda at annuntziadu un’afortiamentu dae inoghe a pagu tempus de is ufìtzios aristanesos.
Csi – Su Tzentru Isportivu Italianu de Aristanis si nde incurat de fàghere mòvere torra s’atividade isportiva. Su Consìgiu de su Comitadu de Aristanis at deliberadu de non fàghere pagare is iscritziones pro totu su 2021 a is assòtzios, a is palestras e a is tzìrculos. In prus at istabilèssidu de ismenguare a 5,00 èuros su costu de su tesseramentu pro un’annu pro is atletas chi tenent prus pagu de 16 annos. Su tesseramentu pro is mannos, imbetzes, at a costare 9,00 èuros isceti.
Dd’at fatu a ischire su presidente provintziale de su Csi, Francesco Federico.
Lunis, 8 de freàrgiu de su 2021
commenta