Prima categoria

Su Gazetinu, 7 de freàrgiu de su 2021

Su Gazetinu

Su Gazetinu OK

Su Gazetinu, 7 de freàrgiu de su 2021

Su Gazetinu

Arrestadu – A unu senegalesu de trinta annos chi est residente in Aristanis dd’at arrestadu s’Iscuadra mòbile de sa Politzia in tzitade cun s’imputu de trampa agravada. Nch’est renèssidu a si fàghere dare dae un’òmine de chimbanta annos de su Guiltzier agiomai chentu mìgia èuros, impromitende-ddi de ddu liberare dae su chi s’òmine pensaiat chi esseret sa malasorte. Paret chi su senegalesu si siat fatu agiudare dae unu maiàrgiu chi istat in Àfrica.

Fogu in domo – Iscuta de timoria eris in Norghiddo in ue at leadu fogu su sostre de una domo. Su fogu est mòvidu dae sa canna de sa ziminera. Is Vìgiles de su Fogu de su distacamentu de Abbasanta nche sunt renèssidos a firmare su fogu, in antis de s’ispàrghere a is àteras partes de sa domo.

Cumponidore – Su Grèmiu de is massajos at detzìdidu de nominare a su cumponidore, mancari chi ocannu sa Sartìllia in Aristanis non si currat. Su sèberu de su presidente de su Grèmiu Nando Faedda at pertocadu a su cadderi Maurizio Casu.

Domìnigu, 7 de freàrgiu de su 2021

commenta

Tutte le notizie

Su Gazetinu, mèrcuris 24 de abrile de su 2024

Su Gazetinu, mèrcuris 24 de abrile de su 2024

Dae su beranu a s’atòngiu, in cumpangia de Monumentos Abertos – Dae su mese de maju fintzas a su mese de santugaine, 76 intra de tzitades e biddas de Sardigna, cun s’atzunta de Bitonto, in Pùllia, e de Ferrara, in Emìlia Romànnia, ant a abèrrere is ghennas de is monumentos issoro. Monumentos Abertos at a propònnere ocannu puru unu biàgiu longu pro iscobèrrere unos cantos benes culturales e naturales sardos e italianos. Su tema seberadu pro sa de XXVIII editziones de sa manifestatzione cuncordada dae s’assòtziu Imago Mundi est “Logos pro is bisos”, movende dae su connotu e castiende a su tempus benidore.

Pro custa ocasione s’ant a pòdere bisitare prus de 800 monumentos, balende-si de s’acumpangiamentu e de is contos de agiomai 20.000 istudiantes e voluntàrios.

S’at a cumentzare sàbadu 4 e domìnigu 5 de maju dae Nurachi, Portu Turre, Cuartu Sant’Aleni, Samassi, Santu ‘Èngiu, Tàtari e Sant’Antiogu. E s’at a acabbare in Casteddu, sàbadu 26 e domìnigu 27 de santugaine.

In mesu ddoe sunt Aristanis, s’11 e su 12 de maju, e S’Alighera, su 18 e su 19 de maju, Terranoa, su 25 e su 26 de maju. Is duos apuntamentos foras dae s’ìsula s’ant a fàghere in atòngiu, su 12 e su 13 de santugaine, in Bitonto, e su 19 e su 20 de santugaine, in Ferrara.

“Semus acostende a is primos 30 annos de vida de Monumentos Abertos”, narat su presidente de s’assòtziu Imago Mundi, Massimiliano Messina. “S’editzione de su 2024 dda bolemus dedicare a Linetta Serri, chi est istada pro unos deghe annos una colunna pro s’assòtziu nostru. Un’esempru pro totus, chi amus a sighire de seguru. In dae in antis de una pèrdida aici manna, Monumentos Abertos in su 2024 creschet: difatis, in Sardigna nche tenimus prus amministratziones comunales chi pigant parte a sa retza, intradas noas, dae su Cabu de Susu a su Cabu de Giosso, comente a Alzachena o Nurachi, Lungoni o Nuxis, pro nde remonare una pariga, paris cun sa torrada de tzitades de importu, comente a Terranoa e Tèmpiu. E custu bolet nàrrere prus iscolas, prus assòtzios culturales, prus istudiantes e voluntàrios impignados, prus comunidades. Un’ispera bona pro su tempus benidore”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.