Su Gazetinu, 28 de ghennàrgiu de su 2021
Su Gazetinu
Pro torrare in zona groga – Cun una lìtera mandada a su Ministru de sa Salude Speranza, su Presidente de sa Regione Christian Solinas at domandadu sa mudadura luegos de s’ordinàntzia de su 22 de ghennàrgiu passadu pro chi sa Sardigna torret in classificatzione in colore grogu. Si nono, at iscritu su Presidente Solinas, s’ant a incarrerare atziones legales pro evitare àteros dannos a unu territòriu giai turmentadu dae sa crisi. A parre de su Presidente de sa Regione, sa ponidura de sa Sardigna in zona in colore de arantzu no est motivada, e non faghet nemmancu a seberare cun seguresa cale siant istados is datos de riferimentu pro leare custa detzisione.
Die de su regordu – In biddas meda de sa provìntzia de Aristanis eris s’est tzelebrada sa Die de su regordu. In Arborea ant prantadu una matighedda de olia in su giardinu de su Museu de sa bonìfica. Sa sìndiga Manuela Pintus at detzìdidu de regordare aici a is vìtimas de sa Shoah e de onorare a totu cussos chi si sunt postos contras de su nazismu, sarvende vidas meda in sa de duas Gherras mundiales.
In Abbasanta, in dae in antis e su munitzìpiu, ant cuncordadu un’aparitzu in regordu de Auschwitz. Sa faina dd’at contivigiada su Comune, paris cun sa consulta de is giòvanos de sa bidda.
Eris a mangianu, imbetzes, su sìndigu de Crabas Andrea Abis e s’assessore de sa Cultura Carlo Trincas ant retzidu in dae in antis de su palàtziu comunale de pratza de Lionora una rapresentàntzia pitichedda de su mundu de s’iscola. Sa dirigente Marina Enna, acumpangiada dae una cantas maistras, at cunsignadu pinturas, poesias, manifestos fatos dae is dischentes, chi ddos ant postos in mustra in sa bacheca comunale, a manera chi totu is tzitadinos ddos potzant bìere.
Giòbia, 28 de ghennàrgiu de su 2021
commenta