Su Gazetinu, 23 de ghennàrgiu de su 2021
Su Gazetinu
Sa Sardigna torra in colore de arantzu – Sa Sardigna torrat zona in colore de arantzu. Est arribende s’ordinàntzia de su ministru Speranza chi faghet intrare is règulas noas pro firmare s’isparghidura de su coronavirus. E torrat una filera de proibimentos. In arriscu s’abertura de is iscolas superiores. Is possibilidades de si transire sunt ismenguadas. Bar e ristorantes abertos isceti pro nche leare sa cosa de bufare o de papare. Torrant a serrare is museos, chi aiant apenas torradu a abèrrere.
Vatzinos contras de sa Covid-19 – Sa prima fase de vatzinatzione contras de su coronavirus contivigiada dae su Servìtziu de Igiene pùblica de s’Assl de Aristanis est agabbada. Si sunt fatas 2.136 doses de su vatzinu Pfizer-Biontech. Gràtzias a s’arribu de àteras fruniduras, martis chi benit 26 de ghennàrgiu at a mòvere sa vatzinatzione cun sa de duas doses a totu cussos chi ant giai fatu sa prima. Pro immoe is vatzinos ant interessadu istruturas de ispidale, operadores sanitàrios de su territòriu – intra de issos Usca, ispetzialistas ambulatoriales, mèigos de meighina generale, pediatras a sèberu lìberu – e Rsa.
Perlongada s’allerta mèteu – S’avisu de allerta mèteu de s’Amparu tzivile regionale pro bentu e abba dd’ant perlongadu fintzas a custu merie, a is 13.59. S’avisu cun crititzidade ordinària (allerta groga) faeddat de arriscu idràulicu e idrogeològicu in is zonas de Montibèciu-Pischinàpiu, Tirsu e Logudoro.
Sàbadu, 23 de ghennàrgiu de su 2021
commenta