Su Gazetinu, 14 de ghennàrgiu de su 2021

Su Gazetinu, 14 de ghennàrgiu de su 2021

Su Gazetinu

Giòvana morta in Ollasta – Cummovimentu mannu in Ollasta pro sa morte totu in una de una giòvana de 22 annos, Jessica Flore, chi s’est intesa male. Sa Procura de sa Repùblica de Aristanis at domandadu un’averiguamentu mèigu. Sa giòvana est morta in domo sua, in ue dd’at sucurta su personale de su 118.

Mèigu denuntziadu – A unu mèigu ginecòlogu originàriu de sa provìntzia de Casteddu, Antonio Ciccia, chi faghet servìtziu in is poliambulatòrios de Abas e Terraba, dd’at denuntziadu sa Guàrdia de Finàntzia pro trampa. Is militares nde dd’ant issucutadu benes pro 150 mìgia èuros de valore, pro ite ca paret chi in is ùrtimos 14 annos apat leadu rembursos pro trasfertas chi non ddi tocaiant.

Sartilliedda annuddada – Sa Sartilliedda de su 2021 dd’ant annuddada pro more de su coronavirus. Dd’at fatu a ischire sa Pro Loco. Annuddadu fintzas su corteu istòricu chi acumpàngiat sa Sartìllia. Non fiat acontèssidu mai.

Refudos nucleares – Is consìgios comunales de Sardigna ant a provare unu documentu pro nàrrere chi nono a s’idea de cuncordare in s’ìsula nostra su depòsitu de is refudos nucleares. Est su chi ant istabilèssidu is sìndigos sardos in un’addòbiu cuncordadu in Casteddu dae s’Anci.

Amiantu – Sa Provìntzia de Aristanis at publicadu unu bandu nou pro assignare contributos a privados pro nche bogare dae is fàbbricos su tzimentu-amiantu. Is domandas bolent presentadas a intro de su 28 de freàrgiu.

Giòbia, 14 de ghennàrgiu de su 2021