Su Gazetinu, 13 de ghennàrgiu de su 2021
Su Gazetinu
Covid-19, bator mortos in provìntzia de Aristanis – Bator mortos e 28 impestos noos eris in provìntzia de Aristanis pro more sa Covid-19, cunforma a su chi at fatu a ischire s’Unidade de crisi regionale. Is Comunes de Norghiddo e Arruinas ant fatu a ischire, onniunu pro su chi ddi tocat, de un’impestu e de duos impestos in is duas biddas.
Vatzinos contras de sa Covid-19 – A s’Assl de Aristanis sunt arribadas àteras 468 doses de vatzinu. Dae custu mangianu sighit sa campagna de vatzinatzione cun su personale de s’ispidale de Santu Martinu de Aristanis. A pustis s’at a sighire cun is ispidales de Bosa e Ilartzi.
Servìtziu tzivile – Is progetos de su Servìtziu tzivile prevididos in provìntzia de Aristanis sunt 48. Ddoe podent pigare parte giòvanos intra de 18 e 28 annos. Is domandas bolent presentadas a intro de s’8 de freàrgiu.
Bentu e maretadas – Oe pro totu sa die e cras fintzas a is 15.00 si prevident in Sardigna bentu forte e maretadas. S’Amparu tzivile regionale at bogadu un’avisu de cunditziones mèteu contràrias.
Licheri ghiat is coros sardos – Doriana Licheri, presidente de su Coro Sa Pintadera, est sa presidente de s’assòtziu nou de is coros sardos. In su diretivu ddoe sunt fintzas àteros duos aristanesos: Rimedia Sanna e Paolo Tola.
Mèrcuris, 13 de ghennàrgiu de su 2021
commenta