Su Gazetinu, 3 de ghennàrgiu de su 2021
Su Gazetinu
Duos frocos biaitos pro saludare su 2020 chi agabbat e su 2021 chi cumentzat – Duos frocos in colore biaitu ant serradu s’annu betzu e abertu su nou in su repartu de Ostetrìcia de s’ispidale “Santu Martinu” de Aristanis.
Eris a mangianu, a is 10.47, est nàschidu Giona, unu pipiu bellu chi at marcadu in sa pesa 3,020 chilos. Dd’abetaiant sa mama Veronica e su babbu Giacomo, de Santa Caderina de Pitinuri. S’isfindigòngiu naturale dd’ant contivigiadu sa maistra de partos Simona Firinu e sa ginecòloga Annita Dessì.
A s’ùrtimu nàschidu de s’annu chi nch’est essidu, imbetzes, ddi narant Leonardo, nàschidu a is 12.53 de su 29 de nadale, issu puru cun isfindigòngiu naturale, agiudadu dae sa maistra de partos Maria Chiara Deriu e dae sa ginecòloga Francesca Campus, diretora de su repartu de Ostetrìcia e Ginecologia. Su pipiu, fìgiu de mama Claudia e babbu Antioco, residentes in Iscanu, at pesadu 3,090 chilos.
Su 2020 s’est serradu cun 529 nàschidas noas in s’ispidale “Santu Martinu” de Aristanis, in ue a sas mamas si oferint unos cantos sèberos diferentes. Intra de custos s’isfindigòngiu sena de dolore, su chi ddi narant rooming in, est a nàrrere sa possibilidade pro sas mamas de nche passare cun su pipiu totu su tempus chi bolent, favoressende aici s’allatamentu dae su sinu.
Domìnigu, 3 de ghennàrgiu de su 2021
commenta