Su Gazetinu, giòbia 28 de martzu de su 2024
Sardigna, terra de agriturismos – Is agriturismos sardos gosant de salude bella. Est su chi nde essit a pìgiu dae s’elaboratzione de Coldiretti Sardigna, a tenore de is datos de s’Istat, presentada su 25 de martzu in Lollove in s’addòbiu de Terranostra Sardigna, s’assòtziu de Coldiretti chi rapresentat is agriturismos.
Cun 142 mìgia presèntzias (+ 20% in un’annu e + 50% in is ùrtimos deghe annos) e 40 mìgia arribos (+ 29,6% in un’annu e + 60% in is ùrtimos deghe annos), su 2022 s’est cunfirmadu s’annu de is record pro s’ìsula, lompende aici a is nùmeros de su 2019, cunsideradu de seguru su mègius annu de semper.
Ancoras, is datos Istat manigiados dae Coldiretti mustrant chi in s’ìsula (su 2022 est istadu s’ùrtimu annu de rilevamentu) sunt abertas 777 siendas agriturìsticas autorizadas, nùmeru chi – pro segare in curtzu – no est mudadu in is ùrtimos annos, cun sa Sardigna chi rapresentat su 3% de s’òferta natzionale.
De totu is siendas, s’81% faghet acasàgiu, su 72% ristoratzione, su 28% àteras fainas acapiadas (che a cussas isportivas e culturales) e su 13% faghet fainas de tastadura, mentras is letos de su sistema sunt 7,2 mìgia, cun una mèdia regionale de 11 postos pro ònnia sienda, ma fintzas 40,8 mìgia postos pro papare (regione cun una mèdia aziendale de 72 postos, sa prus arta de Itàlia). Intra de is àteros datos s’ischerant is 407 pratzigheddas pro parchegiare.
In custa situatzione, s’ischerat fintzas su movimentu econòmicu sardu de is agriturismos: in su 2022 is fainas acapiadas a sa multifuntzionalidade agrìcula de s’ìsula, cumentzende dae is agriturismos, ant prodùsidu 225 milliones de èuros, est a nàrrere agiomai su 10% de su Pil agrìculu regionale.
“Is agriturismos sardos afòrtiant s’identidade gràtzias a is produsimentos issoro e a sa manera semper prus sustenìbile de fàghere impresa de chie ddos ghiat”, decrarat Luca Saba, diretore de Coldiretti Sardigna. “Custu ispìritu imprenditoriale mustrat s’abilèntzia chi ddoe est in custu setore de pònnere paris is valores de Coldiretti, gràtzias a su contu chi faghent is territòrios”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.