FRANCESCA ANGELA CANU vedova Perra

Su Gazetinu, mèrcuris 7 de mese de ledàmene de su 2026

Serrandas abbassadas pro is tzilleris de sa Sardigna – In ses annos, in Sardigna ant serradu 523 tzilleris. No est unu nùmeru isceti: cun is tzilleris isparessent fintzas servìtzios e logos de sotzialidade, prus che totu in is biddigheddas piticas. Intra de su 2019 e su 2025 su nùmeru de tzilleris in s’Ìsula at ismenguadu dae 6.016 a 5.493, cun una pèrdida de s’8,7%, prus bassa de sa pèrdida a livellu italianu, chi est istada de su 14,2%.

Su chi prus ponet pistighìngiu est in ue is tzilleris ant serradu: de is 523 tzilleris pèrdidos, 415 s’agatant in is comunes chi non sunt cabu-de-logu, agiomai s’80% de is chi ant serradu. In is tzitades cabu-de-logu sa pèrdida si firmat a su 7,1%, mentras in is àteros comunes lompet a su 9,3%. Unu datu chi, pro Confesercenti Sardigna, pintat s’indebilitamentu a bellu a bellu de sa retza de is impresas chi tenimus acanta.

A parre de Gian Battista Piana, diretore regionale de Confesercenti Sardigna, sa serrada de unu tzilleri in una biddighedda “bolet nàrrere a pèrdere unu servìtziu, unu logu de addòbiu, unu de is ùrtimos logos de sotzialidade chi fiat abarradu in sa comunidade”.

S’ismèngua prus manna pertocat su Sud de Sardigna (- 11,7%), sighidu dae Tàtari (- 10,2%) e Aristanis (-9,2%). Pro su chi pertocat is valores assolutos, Tàtari connoschet 236 tzilleris in mancu, sighida dae su Sud de Sardigna (- 118), Casteddu (- 63), Aristanis (- 56) e Nùgoro (-50). Intra de is tzitades cabu-de-logu, Aristanis est sa prima pro serradas: in sa tzitade de Lionora, difatis, de 160 tzilleris nde sunt abarrados abertos 126 isceti, cun un’ismèngua de su 21,3%.

Confesercenti contat in 156,9 milliones de èuros a s’annu sa richesa chi est mancada in is cussòrgias de Sardigna, cunsiderende unu faturadu mesanu de 190 mìgia èuros pro onni atividade. De custos, 124,5 milliones mancant in is comunes chi non sunt cabu-de-logu.

S’Ìsula mustrat però unu nùmeru de serradas prus bassu de sa mèdia italiana e apoderat una de is carchesas de tzilleris prus artas: 3,52 ònnia 1000 bividores in su 2025, contras de su 2,47 in Itàlia.

A parre de Confesercenti, s’ismèngua cunfirmat s’arriscu de desertificatzione cummertziale. “Tzilleris, butegas, àteros servìtzios pùblicos de acanta sunt un’infrastrutura econòmica e sotziale”, acabbat Bastiano Rosu, presidente de Fiepet-Confesercenti.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.