In evidenza:
CLICCA SUL NECROLOGIO PER INGRANDIRE L’IMMAGINE
Su Gazetinu, chenàbura 11 de cabudanni de su 2026
Sos eventos de sa coa de chida in s’Ìsula – Traditziones, isport, cultura, ispetàculu e eno-gastronomia ponent in movimentu sa coa de chida in Sardigna.
In Aristanis torrat, a pustis de 16 annos, Sardegna Cavalli. Finas a domìniga in sos impiantos de sa Sotziedade Aristanesa de Ecuitatzione in Sa Rodia b’at a àere garas, ispetàculos ecuestres, folklore, mùsica e atividades pro sas famìllias. In programma b’at finas una mustra-mercadu, un’àrea pro mandigare e sa Biddighedda de sos Cadderis Pitzinnos.
Semper in su capoluogu, su Cabudanni Aristanesu sighit cun L’Isola che Vespa, dae custu sero a domìniga. Cras comintzat sa pallacanestro in su Palasport de Sa Rodia cun Dìnamo Tàtari – Valtur Brindisi, e in sos parchègios de Sa Rodia b’at un’omàgiu a Bud Spencer. Domìniga in pratza Luigi Pintus b’est sa de 17 Copas Santa Barbara – Memorial Beppe Meloni, dedicada a su tziclismu.
In Baressa, dae oe finas a domìniga torrat sa de 33 editziones de sa Sagra de sa Mèndula.
In Sabarussa, domìniga pro su Cabudanni Sabarussesu b’est su seminàriu “Danza in sospensione” cun sa mastra Elena Allevi.
Festa, traditzione e allegria in Bilartzi in localidade Trempu pro sas festas in onore de Santa Maria de s’Ausìliu.
In Sulcis, finas a cras in Carloforte b’est su Shtradde Festival dedicadu a su teatru de istrada e a sas artes performativas, e in Ceraxius est in su mègius de andare s’Isposalìtziu Antigu Ceraxinu, ammentu de comente fiat s’isposalìtziu campidanesu de unu tempus. Domìniga est sa die prus importante, antitzipada dae su tràmudu de s’atziva e dae àteros eventos.
Segundu momentu de Atùngiu in Barbàgia: Ulìana retzit sa gente sàbadu e domìniga.
In Biddeputzi cras sero b’est su Marconi Wine Experience 2026 – White Edition in pratza Marconi, cun sos binos sardos acumpangiados dae màndigos, mùsica e intratenimentu.
In ùrtimu, in Biddanoa ‘e Forru in sa coa de chida torrat Mestieri, Saperi & Sapori. Sunt protagonistas sas traditziones locales cun sas sagras de “simbua frita cun satitzu e cìxiri cun peis de procu”, pro connòschere mègius sos sabores de sa coghina biddanoesa.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
commenta