Tropu longos is tempos de isetu in is Prontos sucursos – In Sardigna unu malàidu ònnia bator abbandonat su Prontu sucursu in antis de sa bìsita, cando ddis sunt faghende is averiguaduras o si nono in antis de sa serrada de sa cartella clìnica. Est su chi nde essit a pìgiu dae su raportu in contu de s’istadu de salude de sa sanidade contivigiadu dae s’Agenas, s’Agentzia natzionale pro is servìtzios sanitàrios regionales.
S’istùdiu de is retzas chi dipendent dae su tempus dd’ant fatu ocannu passadu pighende in cunsideru is resurtados de s’averiguamentu cunforma a su 2022. In 12 meses is intradas a is Prontos sucursos in Sardigna sunt istadas 185.422. Pro is còdighes biancos nd’at essidu a campu unu tempus de permanèntzia mesanu de 125,73 minutos, cunforma a sa mèdia natzionale de 164,26.
Pro is còdighes birdes su tempus nche àrtziat a 255,91 minutos, prus de sa mèdia natzionale de 229,96. Ddoe sunt, ancoras, is còdighes grogos, cun unu tempus de permanèntzia in s’ìsula nostra de 418,66 minutos cunforma a sa mèdia de 416,51 in Itàlia. In fines is còdighes rujos: pro is malàidos prus graves su tempus de permanèntzia mesanu est de 295,78 minutos, mentras su datu natzionale est de 403,30 minutos.
Su chi ponet pistighìngiu est su datu chi pertocat s’abbandonu de is Prontos sucursos, chi in su 2023 est lòmpidu a su 24,3%, su prus artu in totu Itàlia. Custu bolet nàrrere chi de 185.422 malàidos chi ddoe sunt andados in un’annu, sa bellesa de 45.088 sunt furriados a domo in antis de sa diàgnosi.
Sa mèdia natzionale est de su 6,29%, cun sa Badde de Aosta (0%), sa Basilicata (1,3%) e su Vènetu (1,65%) chi ghiant sa classìfica.
S’istùdiu pigat in cunsideru fintzas sa Chirurgia de emergèntzia. A manera particulare, segundu s’Agentzia natzionale pro is servìtzios sanitàrios regionales, in Sardigna est bassa sa proportzione de is infartos acutos in su miocàrdiu curados in is primos 90 minutos. Ponet pistighìngiu fintzas su livellu de mortàgia a tretu de unu mese pro infartos, chi in s’ìsula propassat s’8%. Bolet sinnaladu, in prus, su livellu de mortàgia pro ictus, artu meda in provìntzia de Aristanis e in Ogiastra.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.