Su Gazetinu, chenàbura 25 de cabudanni de su 2026
Sos eventos de sa coa de chida in Sardigna – In mesu de biddas in festa, atopos culturales, mùsica e eventos isportivos mannos, a s’Ìsula nd’est imbatende una coa de chida prena de eventos.
Pro Atùngiu in Barbàgia sa firmada noa est in Austis, Orane e Durgali, tres biddas chi aberint sas giannas a traditziones, artesanadu e produtos de su territòriu. In Durgali s’itineràriu “Tessende filos de oro” acumpàngiat peri s’arte de s’oreria, sa tzeràmica e sos produtos tìpicos, imbetzes Austis presentat artesanadu e sabores de Mandrolisai. Orane cunfirmat su ligàmene suo cun s’arte e sas traditziones de su logu.
Campu lìberu pro s’isport: sighit finas a domìniga sa Sardinia Gravel Race, bator dies peri sas istradas de sa Sardigna tzentru-otzidentale in sos territòrios de Monte Arci, Sinis, Terrabesu e zona de Aristanis, cun atletas chi benint dae logos meda.
Est protagonista finas sa mùsica: in Casteddu, custu sero finit su programma de “Tre sere al Tabacchi” in su Tabacchi Club, cun literadura, umorismu e mùsica, e cras su Cunservatòriu Porrino òspitat unu cursu de perfetzionamentu de jazz, blues, funk e latin dedicadu a sos istrumentos aeròfonos.
Sighit sa festa de Santa Arega in Dèximumannu, in programma finas a su 4 de santugaine, cun funtziones religiosas e ispetàculos.
Finas in provìntzia de Aristanis sos eventos non mancant: oe e cras su Palasport Sa Rodia in Aristanis òspitat su Sardegna Volleyball Challenge, e custu sero in su Teatru Garau finit Island Connect II cun dantza, acrobàtica aèrea e una mesa tunda. Domìniga in su Museu Diotzesanu Arborense b’at a èssere su cuntzertu “Classiche emozioni”.
Pro sas traditziones, in Bonàrcado sighit sa festa de Nostra Segnora de Bonacatu e in Sabarussa cras torrant s’Alliga Day e “Cantos de Cabudanni”. In Norghiddo finit sa festa de Santa Maria de sa Mertzede. In ùrtimu, oe in sa pineta de Zuràdili in Marrùbiu campu a sos prus piticos cun “Tutto suona: dallo scarto al suono”.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
©Riproduzione riservata
commenta