Sanidade sarda, resursas noas e assuntziones: dae s’istabilizatzione de is Oss a is mèigos in is presones

Su Gazetinu, mèrcuris 23 de cabudanni de su 2026

Sanidade sarda, resursas noas e assuntziones: dae s’istabilizatzione de is Oss a is mèigos in is presones – Sa sanidade sarda provat a afortigare is orgànicos: dae s’istabilizatzione de is operadores sotziusanitàrios a sa chirca de mèigos pro is istitutos penitentziàrios, fintzas a su reconnoschimentu econòmicu pro chie traballat in is Prontos Sucursos. Custos sunt is ùrtimos disponimentos de sa Regione pro sa sanidade.

Sa Giunta at aprovadu su disinnu de lege pro s’istabilizatzione de is Oss (operadores sotziusanitàrios) in is siendas de su Servìtziu sanitàriu regionale. Sa protzedura pertocat a is chi ddos aiant seberados cun una seletzione pùblica e at fatu a su mancus 18 meses de servìtziu e, de custos, a su mancus 6 intra de su 31 de ghennàrgiu 2020 e su 31 de nadale 2026. Is chi ant traballadu a su mancus 6 meses in s’emergèntzia Covid sunt favorèssidos. “Cun custu disinnu de lege”, decrarat sa presidente Todde, “bolimus dare una prospetiva istàbile a professionalidades chi su sistema sanitàriu regionale at giai formadu e chi ant giai traballadu in su setore pùblicu in is annos prus dificultosos”.

Pro is Oss si previdet fintzas s’acabbu, a bellu a bellu, de sa somministratzione, ammìtida pro bisòngios urgentes isceti. Is istabilizatziones ddas ant a finantziare cun resursas giai destinadas a su personale.

Novas fintzas pro su chi pertocat is presones. Ares Sardigna at publicadu unu cuncursu pro 21 dirigentes mèigos de Meighina interna pro is istitutos penitentziàrios de s’Ìsula: 6 postos si prevident pro sa Asl de Tàtari, 1 in Gaddura, 1 in Nùgoro, 5 in Aristanis, 2 in su Campidanu de Mesu e 6 in Casteddu. Faghet a presentare sa domanda a intro de s’11 de santugaine.

In fines, sa Giunta regionale at prevìdidu agiomai 6 milliones de èuros pro s’indennidade de Prontu Sucursu: 5.993.910 èuros, est a nàrrere sa metade de is resursas prevìdidas pro su 2026. A sa Sardigna ddi tocant unos 11,99 milliones. “Custu interventu tenet sa punna de reconnòschere e avalorare su traballu de is professionistas impignados ònnia die in is Prontos Sucursos nostros”, at naradu sa presidente Todde.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.