Dae sa talassemia a su biancu de s’ogru, s’annoadura passat peri sa Sardigna

Su Gazetinu, lunis 14 de cabudanni de su 2026

Dae sa talassemia a su biancu de s’ogru, s’annoadura passat peri sa Sardigna – Dae sa terapia gènica pro sa talassemia a sa chirurgia avantzada pro sarvare sa vista, sa sanidade sarda incùngiat duos resurtados de primore in sa cura de patologias cumplessas. Custas sunt is ùrtimas novas chi lompent dae is ispidales casteddajos, su “Brotzu” e sa “Sienda ospedalieru-universitària”, protagonistas de duas tècnicas annoadoras chi aberint prospetivas noas pro is malàidos.

In s’ispidale “Brotzu”, pro sa prima borta in Sardigna, ant fatu una terapia gènica a una persone adulta malàida de talassemia major, impreende is tzèllulas istaminales emapoièticas suas etotu, chi ddas aiant mudadas in antis pro su chi pertocat sa genètica. A su malàidu dd’ant dimìtidu in cunditziones bonas e, in s’ùrtimu mese, no at tentu bisòngiu de trasfusione peruna. Is esàmenes, in prus, nde faghent essire a campu una crèschida a bellu a bellu de s’emoglobina totale e de cudda prodùsida dae is tzèllulas mudadas.

“Pro sa Sardigna, e prus che totu pro is persones chi bivent cun sa talassemia, custu bolet nàrrere a abèrrere una prospetiva noa, cuncreta, pro una vida prus pagu marcada dae sa maladia”, narat professore Giovanni Caocci, diretore de Ematologia e Ctmo de s’ispidale “Businco”.

Ma un’àteru resurtadu de primore lompet dae s’AOU de Casteddu, in ue in s’acabbu de su mese de trìulas a una fèmina de 53 annos dd’ant fatu un’interventu chi at postu paris su trapiantu de su biancu de s’ogru cun sa neurotizatzione corneale. Est sa prima esperièntzia de custa genia in s’Ìsula e intra de is primas in Itàlia. Sa tècnica, chi s’impreat in is formas prus graves de cheratopatia neurotròfica, punnat a torrare a bellu a bellu sa sensibilidade a su biancu de s’ogru gràtzias a su tramudu de fibras nervosas sanas.

Sa cambarada de mèigos ghiada dae professore Giannaccare at otentu, in prus, unu finantziamentu de 400 mìgia èuros dae su Ministèriu de sa Salude pro sa chirca de istrategias noas pro curare su biancu de s’ogru. Duos interventos diferentes s’unu dae s’àteru, ma chi faghent arribare a Sardigna curas e àndalas de chirca semper prus avantzadas.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.