Su Gazetinu, chenàbura 28 de austu de su 2026
S’Ìsula parat fronte a s’istiu de sos maleducados – Umbrellones pro si prenotare su logu, gommones in tretos de mare tutelados, plajas ocupadas a intro de note: s’istiu de su 2026 sighit a presentare maneras de cumportamentu maleducadas e sas autoridades bi devent parare fronte cun secuestros, multas e controllos semper prus a fine. Sos episòdios sunt creschende dae nord a sud, faghende nàschere unu dibàtidu semper pretzisu pro comente si godire sas plajas.
In Bosa marina a primos de austu sa Guàrdia costera, faghende s’operatzione “Mare e Laghi Sicuri 2026”, at secuestradu una chimbantina de cadireddas e de umbrellones lassados pro marcare su logu in tretos lìberos de plaja.
Sa note intre su 18 e 19 de austu, sa Forestale e sos barratzellos si sunt ativados in Baia delle Mimose, in Badesi, e nd’ant piscadu 97 umbrellones, 109 cadireddas de mare, duas tàulas pro fàghere surf, chimbe cadiras de pinnigare e paritzos giogos, bidu chi non rispetaiant s’ordinàntzia balneare de su 2026. Ant aplicadu finas duas multas.
Su 19 de austu sos carabineris de s’Asinara ant multadu a unu turista agatadu in unu gommone a motore in Cala Sabina, in sa Zona B de s’àrea marina proteta, in ue non si bi podet passare.
In Thiniscole un’òmine de 51 annu, Claudio Stangoni, nch’est intradu in sa crònaca natzionale a pustis chi unu vìdeu l’at fatu bìere boghende·nche letigheddos e umbrellones postos pro marcare su logu in La Caletta: «Custa no est sa plaja de sos turistas chi ponent sos umbrellones comente mègius lis agradat. Custa est sa plaja de totus».
In custu cuntestu intervenet Adiconsum Sardigna, chi pedit a sa Regione unu Pranu pro pòdere bìvere paris in manera tzivile, fundadu subra de s’informatzione, su prevenimentu, sos controllos coordinados, sas multas chi fatzant efetu e sos provedimentos potentziados pro chie lu torrat a fàghere. Su presidente Giorgio Vargiu non ponet turistas contra a residentes: «Su problema no est dae in ue benit chie faghet su reatu, ma sa manera de si cumportare». S’assòtziu proponet unu sistema de Bàrdia de sas plajas e unu possìbile “daspo turìsticu” pro sas situatziones prus crìticas.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
©Riproduzione riservata
commenta