Sa Sardigna festat s’impignu de sos voluntàrios de sa Protetzione tzivile

Su Gazetinu, mèrcuris 26 de austu de su 2026

Sa Sardigna festat s’impignu de sos voluntàrios de sa Protetzione tzivile – Sa Sardigna at a tènnere issa puru sa Die regionale de sa Protetzione tzivile: s’at a fàghere ogni annu su 23 de cabudanni, die chi ammentat sa memòria litùrgica de Santu Piu de Pietrelcina, patronu de sos voluntàrios. Sa Giunta regionale, a pustis de sa proposta de s’assessora Rosanna Làconi, at aprovadu sos critèrios pro sa prima editzione e cussos pro assignare sos reconnoschimentos a sos membros de su Sistema regionale chi si sunt distintos pro mèritos particulares.

Istituida dae s’artìculu 34 de sa lege regionale 8 de maju 2026, n. 14, sa Die at a tènnere initziativas istitutzionales e de informatzione. Su programma, realizadu paris cun sos assòtzios de voluntariadu, punnat a fàghere connòschere su Sistema regionale sustenende s’amparu de sa vida, s’amore pro sos àteros e sa solidariedade. “Sa Protetzione Tzivile non comintzat cando essit s’alerta: comintzat in antis meda, connoschende sos arriscos e cumportende·si in manera responsàbile”, at decraradu s’assessora Làconi.

Sos reconnoschimentos – medàllias, atestados e alabàntzias – s’ant a pòdere dare a gente, entes e organizatziones chi si sunt distintos in s’atividade de protetzione tzivile. Su regulamentu at a èssere aprontadu dae sa Diretzione generale e presentadu in ocasione de sa prima Die, e sas cunsignas s’ant a fàghere dae sas editziones in fatu.

S’initziativa de sa Sardigna s’agiunghet a unu calendàriu natzionale giai sòlidu. Su 28 de freàrgiu si festat sa Die natzionale de sa Protetzione Tzivile, istituida in su 2017 cun Diretiva de su Presidente de su Cussìgiu pro ammentare sa lege 225/1992 chi at fatu nàschere su Servìtziu Natzionale. In su mese de santugaine si faghet sa Chida Natzionale, istituida in su 2019 in cointzidèntzia de sa Die internatzionale pro su minimamentu de s’arriscu de disacatos naturales de su 13 de santugaine, pro fàghere a connòschere a sa gente s’importàntzia de s’amparu de su territòriu.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.