Su Gazetinu, martis 25 de austu de su 2026
In Sardigna creschent sa produtzione e su consumu de birra – In Sardigna creschet sa passione pro sa birra non solu in su consumu ma fintzas in sa produtzione. Segundu sos datos de s’Ufìtziu Istùdios de Confartigianato Imprese Sardegna, elaborados dae sa fonte Union Camere – Infocamere 2026, a s’acabu de su 2025 sas aziendas chi produiant birra in s’Ìsula fiant 45, e de custas 20 artesanas. In cunfrontu a su 2021 si registrant 9 atividades in prus, cun 3 aziendas artesanas noas. Unu setore chi contat giai 300 ocupados diretos e àteros 400 intre agricultura, logìstica, Ho.Re.Ca (est a nàrrere in sos albergos, ristorantes e bar), imballàgios e consulèntzias, pro unu totale de 800 impiegados.
Pro su chi atenet su consumu, prus de 750 mìgia sardos ant bufadu birra, con un’ispesa chi sobrat sos 70 milliones de èuros, est a nàrrere giai 90 èuros a famìllia a s’annu. Sa produtzione isulana imbatet a 4 milliones de litros, a fronte de sos 17 milliones de etòlitros chi si produent in su restu de Itàlia. A livellu natzionale si contant 802 birrifìtzios, e de custos 313 artesanales, cun sa Lombardia in testa pro nùmeru totale e su Piemonte pro cussos artesanales. Sa Sardigna est a su de sete postos in sa classìfica de sos birrifìtzios artesanales.
Si traballat paris intre territòrios pro fàghere crèschere su setore: un’esempru est sa collaboratzione intre provìntzias de Aristanis e Nùgoro cun sos Distretos rurales de su Giudicadu de Arborea, de sa Badde Mèdia de su Tirsu e de sa Sardigna Tzentru – Otzidentale unidos pro abbalorare sa produtzione de sa birra.
Est in crèschida fintzas s’impreu de ingredientes locales comente murta, mele, agrumes e cereales isulanos, e creschet puru sa produtzione de s’orzu de birra.
“Sas impresas artesanas non produent ebbia una cosa de bufare de calidade, ma dant traballu, sustenent s’economia locale e alimentant unu setore de importu”, concruit Meloni. “Unu setore in crèschida, ricu de possibilidades e ocasiones bonas”, concruit Giacomo Meloni, presidente de Confartigianato Sardegna.
Maria Giovanna Serchisu
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
©Riproduzione riservata
commenta