Cursu de perfetzionamentu in s’Iscola archivìstica de Casteddu: si podent mandare sas domandas

Su Gazetinu, chenàbura 21 de austu de su 2026

Cursu de perfetzionamentu in s’Iscola archivìstica de Casteddu: si podent mandare sas domandas – B’at tempus finas a su 5 de cabudanni pro si candidare a su cursu de perfetzionamentu de s’Iscola de archivìstica, paleografia e diplomàtica de s’Archìviu de Istadu de Casteddu, chi durat duos annos. Est una possibilidade cuncreta pro chie si cheret fraigare una carriera professionale in su mundu de s’amparu e de sa gestione de sos documentos istòricos.

S’iscola casteddaja est una de sas 17 chi in Itàlia agiuant sos 17 Archìvios de Istadu: una retza formativa chi tenet raighinas fungudas, bidu chi sa sede de su capoluogu sardu est nàschida giai dae su 1877. Agiomai chentu chimbanta annos a pustis, s’incàrrigu est abarradu su matessi: de formare archivistas chi siant bonos a s’orientare in mesu de sos momentos diferentes de sa vida de un’archìviu, dae sa produtzione de sos documentos a su custoimentu issoro, passende dae su contivìgiu de ogni die. Unu traballu chi mudat in presse, mòvidu dae sa digitalizatzione e dae sa cumplessidade semper prus manna de sos archìvios de oe.

Su cursu durat duos annos e sos istudiantes podent seberare intre duos indiritzos: cussu paleogràficu pro chie cheret megiorare sa connoschèntzia de sos documentos medievales e modernos, e cussu cuntemporaneìsticu pro chie est interessadu a sas làcanas noas de s’archivìstica digitale e informàtica.

Pro si candidare tocat a tènnere una làurea magistrale, ispetzialìstica o de ordinamentu betzu. Chie devet ancora fàghere s’esàmene finale at a pòdere partetzipare a sa seletzione cun riserva. Sa prova de ammissione s’at a fàghere sa prima die de su mese de santugaine 2026 e previdet unu còmpitu iscritu in contu de sas connoschèntzias istòricas e archivìsticas de base, e in prus una bortadura dae su latinu de unu documentu medievale. Chie nche passat ambas provas intrat in graduatòria.

Su bandu cumpletu e totu sas informatziones ùtiles si podent agatare in su situ de s’Archìviu de Istadu de Casteddu.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.