Su Gazetinu, giòbia 20 de austu de su 2026
Una coa de chida prena de addòbios in Sardigna: comintzende dae su Redentore de Nùgoro fintzas a sa Regata de is Fassonis – Sa manifestatzione chi atirat prus gente est de seguru cussa de sa Festa de su Redentore in Nùgoro chi dae su 22 a su 29 de su mese de austu faghet lòmpere a tzitade isfiladas, mùsica, traditziones sardas e su pellegrinàgiu emotzionante a su Monte Ortobene.
In su Campidanu de Aristanis, s’istàinu de Santa Justa s’est preparende pro acasagiare sa de 45 editziones de sa Regata de is fassonis, in programma sàbadu 22 e domìniga 23 de austu: duas dies dedicadas a una de sas traditziones prus fortes in sa comunidade santajustesa, chi ponet paris istòria, cultura, ambiente, abilidade de sos fassoneris, mùsica e gastronomia in una manifestatzione manna chi tenet sabore antigu.
In Monteferru, su 22 de austu si faghet torra in Cùglieri “Bestires e Caddos”: isfilada a caddu cun sa bestimenta de su connotu, màndigos cun produsimentos tìpicos, mùsica de Giuliano Armas e Dj set a s’acabbu. Semper sàbadu, in Ogiastra, in Baunei torrat sa Sagra de sa petza de craba, arribada ocannu a sa de 43 editziones: un’addòbiu chi non podet pèrdere chie cheret connòschere unu de sos màndigos tìpicos de Barbàgia.
Pro sos amantiosos de cultura e dibatas, su 22 e su 23 de austu ddoe est su Fèstival “Pensieri e Parole” in s’Asinara: iscritores, giornalistas, espertos de ambiente, atores e musitzistas arresonant in contu de sa sotziedade de oe, faeddende de deretos tziviles e mudaduras climàticas, in sa de 21 editziones de su fèstival inghiriadu de sa bellesa ispantosa de s’ìsula-parcu.
E in prus sighint sos addòbios giai comintzados: su Fèstival “Pedras e sonos” ànimat sa Marmidda fintzas a su 23 de austu, faghende arribare sa mùsica a sos logos sìmbulu de su territòriu, mentres in Sìnnia sa Sagra de Santa Aleni, lòmpida a sa de 103 editziones, sighit cun unu programma bellu, religiosu e tzivile, fintzas a su 24 de austu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
©Riproduzione riservata
commenta