Su Gazetinu, mèrcuris 19 de austu de su 2026
Prus giassos pro s’amparu de sos pugiones: su progetu de sa Regione – In Sardigna sa Retza Natura 2000 est aprontende-sì a crèschere. S’Assessoradu de sa Defensa de s’Ambiente at incarreradu sa consultatzione pùblica pro tres propostas chi diant portare s’amparu europeu in subra de prus de 72.000 ètaros: ismanniende duas Zonas de Protetzione Ispetziale chi esistiant de in antis e faghende nàschere una ZPS a nou.
Sa faina naschet a intro de su progetu LIFE Abilas, finantziadu dae s’Unione Europea e chi coordinat s’ISPRA, cun sa punna de nde fàghere torrare a Sardigna una populatzione fissa de Àbilas de Bonelli iscapende-nche pugiones giòvanos e amparende sos ambientes chi ddos acasàgiant.
Sas tres propostas de sa consultatzione pertocat: s’ismanniadura de sa ZPS “Chea de Otieri, Mores, Àrdara, Tula e Òschiri”, dae sos 21.069 ètaros de como a unos 51.833 ètaros, un’àrea chi acasàgiat lobas de Àbilas de Bonelli e nùcleos de importu de Pudda campina, Calàndria e Pugione de beranu; s’ismanniadura de sa ZPS “Costera de Bosa, Sune e Montresta”, dae sos 8.222 ètaros a unos 47.233 ètaros, arribende fintzas a sa zona de mare — inoghe nch’est su nùcleu riprodutivu de Bentùrgiu prus mannu de Itàlia, cun 104 lobas registradas in su 2025; in fines s’istitutzione de sa ZPS noa “Monte Forte – Nurra – Lagu de Baratz”, 9.503 ètaros in territòriu de Tàtari, àrea istratègica pro s’Àbila de Bonelli, su Bentùrgiu e àteras genias migradoras.
Si ddas atzetant, sas propostas diant a fàghere crèschere su tantu de sa Rete Natura 2000 in Sardigna dae su 18,85% de como a su 20,02% de su territòriu regionale, faghende lòmpere s’Ìsula a sos obietivos europeos chi at istabilèssidu s’Istrategia pro sa Biodiversidade a su 2030.
Faghet a nche mandare osservatziones fintzas a su 15 de cabudanni de su 2026 pro mesu de su giassu SardegnaAmbiente.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
©Riproduzione riservata
commenta