Crèschida econòmica in aumentu de su 10,9%: sa Sardigna conchistat su primadu natzionale

Su Gazetinu, martis 28 de trìulas de su 2026

Crèschida econòmica in aumentu de su 10,9%: sa Sardigna conchistat su primadu natzionale – Sa Sardigna curret prus lestra de su restu de Itàlia e, a bator annos dae sa pandemia, est sa regione cun sa crèschida econòmica prus manna de su Paisu. A trainare sa ripresa sunt màssimu sas impresas prus piticas, protagonistas de una ripresa chi at permìtidu a s’Ìsula de conchistare su primadu natzionale pro s’aumentu de sa crèschida econòmica.

Custu nd’essit a campu dae un’anàlisi de s’ Ufìtziu Istùdios de Confartigianadu Impresas Sardigna, chi narat chi intre su 2021 e su 2024 sa crèschida econòmica regionale est aumentada de su 10,9%, prus meda de sa mèdia italiana de su 6,7%. Unu resurtadu chi ponet s’Ìsula a dae in antis fintzas de sas àteras regiones de su Sud, comente sa Campània (+10,4%) e sa Sitzìlia (+10,1%).

S’ispinta prus manna benit dae su setore de sas manifaturas, chi marcat un’aumentu de su 45,1%, mentres sos fràigos creschent de su 38,2% e sos servìtzios de su 5,9%. Finas sena cunsiderare s’edilìtzia, sa Sardigna abarrat sa prima regione italiana pro crèschida econòmica, cun un’aumentu de su 9,2%.

S’istùdiu, chi esàminat 82 cumpartos produtivos, mustrat fintzas s’andamentu de s’artesanadu. Intre su 2019 e su 2024 su totale de sas impresas artesanas est minimadu de su 2,4%, ma in sos 24 setores cunsiderados de punta si biet una crèschida de su 9%, cun 1.244 atividades noas. Si distinghent màssimu su benèssere, sas domos fraigadas rispetende sa natura e sa tecnologia digitale.

Pro su presidente de Confartigianadu Sardigna, Giacomo Meloni, sos datos cunfirmant sa capatzidade de reatzione de sas impresas sardas, ma non devent fàghere ismentigare sas isfidas ancora abertas, est a nàrrere: “Ismanniare de prus sa base imprenditoriale, favorèssere su ricàmbiu generatzionale, sustènnere sos investimentos e afortigare sa cumpetitividade de sas aziendas nostras pro chi custu caminu de isvilupu si potzat afortigare in su tempus e interessare unu nùmeru semper prus mannu de impresas produtivas”.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.