Su Gazetinu, chenàbura 24 de trìulas de su 2026
Una coa de chida de eventos in s’ìsula – Mùsica, cultura, tzìnema, dantza e sabores locales: in Sardigna una coa de chida prena de eventos.
Custu sero in Ovodda finit “Sonala”, su fèstival chi ponet paris mùsica, teatru e artes de custu tempus cun òspites comente Giorgio Canali, Bombino, Ze in the Clouds, Erica Mou e Pierpaolo Vacca. Casteddu retzit a Elio e le Storie Tese, e in Crabas sighint sos apuntamentos de “I Giganti dell’Arte”, cun mùsica clàssica in pratza Lionora e ballu sardu in Santu Giuanne de Sinis. In Aristanis, pro “Luci d’Estate” comintzat sa Wine Street Experience Sardegna e b’est sa projetzione de “Philomena” in su Tzentru de Servìtzios Culturales paris cun Dromos Fèstival.
Cras e domìniga sighint sos fèstival: in Narcau sa de 36 editziones de su Narcau Blues Fèstival, in Carloforte “Creuza de Mà”, rassigna dedicada a sa mùsica pro su tzìnema, e in Carbònia su Fèstival Literàriu Carta Carbonia cun atopos e autores.
A S’Alighera cras b’andat Tommaso Paradiso pro s’Alguer Summer Festival, e in Crabas est in programma “Morricone dirige Morricone”, cuntzertu dedicadu a sa mùsica de su grandu cumponidore.
Programma prenu finas pro sas sagras: cras e domìniga pro s’Istiu Crabarissu b’est sa sagra de su pische pòberu in pratza Istagnu in Crabas; in Santa Caterina de Pitinuri torrat sa Sagra de su Bitellu, in Sipicia sa Sagra de sa polpetta e in Masuddas sa Sagra de su Porcheddu arrustidu, cun màndigos tìpicos e ballu sardu. Domìniga, in ùrtimu, Cùglieri festat “Panadas 2026” intre gastronomia, cultura e artesanadu.
Semper domìniga in Siris comintzat “Corti senza circuito”, rassigna de cortometràgios de autore, e dae cras in Busache comintzat “Cantos in Sardigna”, progetu de su coro Sa Pintadera dedicadu a Gràssia Deledda.
Sa coa de chida finit cun sa dantza internatzionale importante e cun Roberto Bolle in Forte Arena de Santa Margherita de Pula.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
©Riproduzione riservata
commenta