Su Gazetinu, chenàbura 17 de trìulas de su 2026
Sos eventos de sa coa de chida in programma in s’ìsula – Cuntzertos, ispetàculos, mustras, tzìnema e apuntamentos dedicados a sas traditziones locales in sa coa de chida in Sardigna.
In S’Alighera, dae oe finas a domìniga, su Lidu de Santu Giuanne at a ospitare su Beach Like a Deejay, su bidditzolu in oros de mare firmadu Radio Deejay, e in sa Gaddura Arta sighit finas a domìniga su Tempio Faber Festival cun cuntzertos, teatru, trekking, dimustratziones culinàrias e eventos dedicados a Fabrizio De Andrè.
Atentu mannu finas in contu de tzìnema cun su Festival Cinema de Tavolara – Una notte in Italia, in programma finas a domìniga intre Santu Diadoru, Lòiri e s’Ìsula de Tavolara cun projetziones, addòbios cun sos òspites e resonos intre tzìnema e literadura.
In Aristanis sighit Luci d’Estate 2026 organizadu dae su Comune pro animare su tzentru istòricu e Turre Manna. Cras sero, in sa Pinacoteca Carlo Còntini aberit Secret Pages, sa mustra de Nobuyoshi Araki a incuru de Sonia Borsato pro sa de 28 editziones de su Dromos Fèstival. Sunt espostas 122 òperas fotogràficas de sa Collezione Molinas Balata.
In Marmidda Arta b’est sa prima essida de Albagiara Teatro, rassigna noa nàschida a intro de Sardigna Teatru Fèstival a incuru de sa cumpangia I Barbariciridicoli: cras sero in pratza Mercadu in Ollasta si rapresentat Said de sa cumpangia La Forgia de Murera.
E comintzant finas sas festas populares: in Santu Sparau in sa coa de chida torrat sa Sagra de su Pèssighe, imbàtida a sa de 63 editziones, e Bànari festat sa Chibudda Dorada cun duas dies dedicadas a sos produtos locales e a sos màndigos tìpicos. In Ossi, cras apuntamentu cun sa Sagra de sa Gioga.
In Pauli finas a cras b’est su Summer Beer Fest e in Ìtiri sighit Ìtiri Folk Festa, dedicada a s’iscàmbiu intre culturas cun dantzas, ispetàculos e sotzialidade, in programma finas a su 21 de trìulas.
In ùrtimu, in Terranoa, cras sero est protagonista sa dantza internatzionale prus connota cun sa Nuit des Étoiles.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
©Riproduzione riservata
commenta