Su Gazetinu, chenàbura 10 de trìulas de su 2026
Sìndigos e presidente de sa Regione: cale est su livellu de cunsensu – Sa Sardigna cumparet a duas velotzidades in s’editzione noa de su Governance Poll 2026, s’indàgine de Noto Sondaggi pro Il Sole 24 Ore in contu de su gradimentu de sìndigos e presidentes de Regione. A un’ala creschet su cunsensu de su sìndigu de Casteddu, Massimo Zedda e de sa presidente de sa Regione Alessandra Todde, a s’àtera torrant in segus belle totu sos àteros primos tzitadinos de sos capoluogos isulanos.
Sa classìfica regionale la ghiat Zedda, chi mancat de pagu su pòdiu natzionale cun su de 4 postos e unu livellu de cunsensu de su 63%, in crèschida contra a su 60,3% chi at tentu in sas votatziones. A in antis suo ebbia sa sìndiga de Firenze Sara Funaro (66%), su sìndigu de Ascoli Piceno Marco Fioravanti (65%) e su de Nàpoli Gaetano Manfredi (64%).
Pro agatare un’àteru amministradore sardu tocat de calare finas a su de 18 postos, ocupadu dae su sìndigu de Nùgoro Emiliano Fenu. Mancari mantenende unu cunsensu artu, su 57,5%, nche calat de 5,6 puntos contra a su resurtadu eletorale. Signale positivu, imbetzes, pro su sìndigu de Tàtari Giuseppe Mascia, chi nche pigat a 55,5% e balàngiat 4,4 puntos, imbatende a su de 27 postos de sa graduatòria.
Prus evidente est sa calada pro su sìndigu de Carbònia Pietro Morittu, chi perdet 11,3 puntos contra a sas votatziones e si firmat a su 54,5% de gradimentu. Serrat sa classìfica de sos capoluogos sardos Massimiliano Sanna: su sìndigu de Aristanis si firmat a su 47%, collochende.si in sas ùrtimas positziones de sa graduatòria natzionale.
Diferente est su cuadru pro sa Regione: sa presidente Alessandra Todde imbatet a su gradimentu de su 49%, in crèschida siat contra a su cunsensu otentu in sas votatziones (45,4%), siat contra a sa rilevatzione de su 2025 (46,5%). Sa crèschida de 3,6 puntos l’otenet su de 14 postos intre sos presidentes de Regione elègidos in manera dereta, unu de sos mègius progressos registrados in s’ùrtima editzione de su Governance Poll.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
©Riproduzione riservata
commenta