Su Gazetinu, chenàbura 3 de trìulas de su 2026
Una coa de chida de eventos in Sardigna – Pro sa prima coa de chida de trìulas eventos meda intre cultura, mùsica e traditziones in paritzas biddas de s’Ìsula.
Intre sos apuntamentos de atrativa regionale, sa de XX editziones de su Fèstival literàriu “L’Isola delle Storie” chi s’est faghende in Gavoi finas a domìniga, e in Portescusi dae oe finas a domìniga b’est “Calici in Tonnara”, una tres dies dedicada a sos binos de su territòriu e a sos mègius màndigos.
Visibilidade pro sos libros in su fèstival Éntula, chi custu sero in Portu Turre òspitat sa giornalista Mariangela Pira, e atentzione a su tzìnema documentarìsticu in Crabas: su Sardegna Archeofilm Festival finas a domìniga trasformat su parcu nou de su Museu tzìvicu in una sala tzenematogràfica suta sos isteddos. Intre documentàrios, atopos cun registas e archeòlogos e aprofundamentos dedicados a s’istòria e a su patrimòniu culturale, su programma proponet custu sero unu resonu in contu de su film “Sui tetti di chi dorme”, cras unu seranu dedicadu a sas Domus de Janas e domìniga sas premiatziones cun sa projetzione de “Il viaggio dei Giganti”, dedicadu a Mont’e Prama.
Non podent mancare sas sagras: cras in Narcau si festat sa bitella, Tula proponet sa supa de fenugru agreste traditzionale e Orthullè dèdicat una die a sos sabores de su monte cun becu e càgiu de crabitu, in una manifestatzione chi giughet su marcu de “Sagra de Calidade”.
In Bosa incomintzat custu sero “Tramonti al Castello”, cun unu seranu dedicadu a s’istòria de sos Malaspina e de su Casteddu de Serravalle, irrichida dae su cuntzertu de s’Ambra Pintore Quartetto.
In ùrtimu, in Marrùbiu est in su mègius de andare su programma de “E…state a Marrubiu”: oe b’est su sero de ballos de s’Auser e cras in pratza Roma su cuntzertu finale de su cursu de perfetzionamentu de violinu, trumba e corru de s’Iscola tzìvica de mùsica, e in su matessi momentu sas finales de su torneu de pallavolo de ispiàgia.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
©Riproduzione riservata
commenta