Su Gazetinu, chenàbura 19 de làmpadas de su 2026
Casteddu at ospitadu su Cungressu natzionale de sa Lega italiana contra de s’Epilessia – Sonnu, bio-marcadores e disturbos psichiàtricos sunt s’argumentu de su de 49 Cungressos natzionales de sa Lega italiana contra de s’Epilessia (LICE), fatu in Casteddu e a in ue b’ant partetzipadu prus o mancu 800 professionistas dae totu Itàlia. Un’apuntamentu dedicadu a sos orizontes noos de sa chirca e de s’innovatzione pro sa cura de s’epilessia.
In sos temas printzipales su raportu intre epilessia e sonnu, una relatzione a duas caras chi podet cunditzionare crisis, diàgnosi e calidade de vida. Sos espertos ant sutaliniadu comente unu sonnu avolotadu podet favorèssere s’atividade epilètica, imbetzes sas crisis a su note podent peorare su pasu e sas funtziones cognitivas.
In su seminàriu aunidu LICE-AIMS in contu de epilessia e sonnu est istada posta in evidèntzia s’importàntzia in crèschida de sas tecnologias noas: s’anàlisi de sos signales EEG, datos clìnicos e genèticos, paris cun s’inteligèntzia artifitziale, sunt agiuende a agatare bio-marcadores semper prus definidos.
Custos indicadores biològicos, genèticos e nèuro-fisiològicos podent agiuare a connòschere sas caraterìsticas de sa maladia, a prevìdere comente podet andare a in antis e a nde ghiare sas terapias. S’obietivu est a imbàtere a una meighina semper prus personalizada, cun tratamentos mirados e adatos a su bisòngiu de sos malàidos.
Atentzione finas a sos disturbos psichiàtricos collegados a s’epilessia. Una chirca promòvida dae LICE e fata subra de 164 epiletòlogos italianos at postu in evidèntzia una presèntzia importante de ànsia e de depressione in sa gente cun epilessia, cun balores intre su 20 e su 30% in sos casos resistentes a sas meighinas, cunfirmende su bisòngiu de prus iscàmbiu intre neuròlogos e psichiatras.
Cun prus o mancu 600mìgia malàidos in Itàlia e prus de 50milliones in su mundu, s’epilessia abarrat una de sas maladias neurològicas crònicas prus istèrridas. S’isfida at a èssere a pònnere paris megioros iscientìficos, disponibilidade de sas curas e gherra contra a sos pregiudìtzios.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
©Riproduzione riservata
commenta