Su Gazetinu, chenàbura 31 de martzu de su 2023
Dae sa càtedra de limba frantzesa de su litzeu “Benedetto Croce” de Aristanis fintzas a su Càmerun. Custu est su caminu de professora Antònia Zanda, chi giai dae unu mese at tramudadu a Àfrica. Pro ses annos at a bìvere in Douala, in ue traballat comente a leghidora de italianu in s’universidade de cussu logu.
“S’arribu est istadu bastante forte, non faghet a ddu contare”, narat professora Zanda. “Sa prima die chi apo traballadu in cussa universidade nd’apo bogadu sa bandera sarda e ddis apo faeddadu de sa terra mia”.
Zanda impreat is social network pro contare s’esperièntzia sua in Càmerun. Me in sa retza dda sighint amigos meda, cumpàngios de traballu e istudiantes, fintzas africanos.
Bator annos a immoe professora Zanda aiat propassadu unu cuncursu natzionale e, duncas, dd’aiant nominada in s’Universidade de Douala.
“Tenimus un’àula simpre simpre”, narat professora Zanda, “in ue non ddoe at trastu perunu multimediale. Pro immoe traballo isceti cun duos de libros de limba e grammàtica italiana chi nche so renèssida a nche ghetare a su bagàlliu meu”.
“Is istudiantes sunt atentos meda”, atzunghet Zanda, “bolent imparare. Traballant cun cartolàrios e pinnas, sena de àteras cosas. Medas non tenent nemmancu su computer nen sa cunnessione a sa retza de Internet”.
E no at a istentare a mòvere dae Aristanis unu càrrigu de libros cara a Douala. “Nche so resèssida a coberare unu muntone de libros de italianu gràtzias a is collegas meos de s’Istitutu magistrale”, sighit a contare professora Zanda, “ant a mòvere a intro de unu container in su mese de abrile. Comente arribant, ddos amus a pòdere dare a s’Universidade de Douala e nd’amus a istantargiare una biblioteca de italianu, utilosa pro is istudiantes chi sighint sa matèria mia”.
“S’iscola chi nos praghet”, aiat naradu una pariga de chidas a immoe su dirigidore de iscola de is Magistrales de Aristanis, Salvatore Maresca, saludende a sa collega in partèntzia cara a s’Àfrica, “si ponet in giogu, acasàgiat, isperimentat e brincat is làcanas. Torro gràtzias a is chi tenent e ant a tènnere s’ànimu de ddu fàghere”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2022-2023 – L.R. 22/2018, art. 22.
commenta