Su Gazetinu, lunis 20 de martzu de su 2023 - LinkOristano
Su gazetinu

Su Gazetinu, lunis 20 de martzu de su 2023

Su Gazetinu

Su Gazetinu OK
Su Gazetinu

Su Gazetinu, lunis 20 de martzu de su 2023

Unu mangianu solianu piessignadu dae s’inclusione de dae s’ispàssiu pro unos chentu giogadoras e giogadores a botza cun disabilidade cognitivu-relatzionale chi dae onni furrungone de Sardigna sunt arribados a Aristanis pro sa penùrtima die de is campionados de sa Divisione de fùbalu paralìmpicu e isperimentale de sa Figc. Sàbadu passadu, me in is campos de su Tzentru de formatzione federale “Tino Carta” de Sa Rodia, ddoe ant giogadu oto partidas de fùbalu a sete, onniuna de dura de 30 minutos.

Ddoe fiant is meres de domo de is “Fenicotteri”, cun is duas formatziones de sa sotziedade “Una ragione in più”, ligada a su Tzentru de salude mentale de Aristanis. E, in prus, ddoe fiant sa Macumeresa, s’iscuadra “La Torre” de Carbònia, “Speedy Sport Onlus” d Durgali, s’Atlèticu Terranoa, Juve Luras e sa sotziedade “Ammentos” de Patiolla. Sa “Gioventù” de Assèmini e s’Asso Sulcis, imbetzes, fiant a riposu.

Sàbadu 29 de abrile, semper in Aristanis, ant a giogare is ùrtimas partidas de su de duos e de su de tres livellos regionales. Is iscuadras chi ant a bìnchere custos duos torneos ant a bolare a Toscana, a Coverciano, pro is finales natzionales, in programma sàbadu 20 e domìnigu 21 de maju, in su Tzentru isportivu de sa Figc, chi acasàgiat fintzas a is Asulos de Roberto Mancini.

Su fùbalu est de importu, tzertu, ma su progetu Dcps bolet abbiatzare fintzas àteros valores. Primu de totu bolet regalare un’iscuta de pasu e de presu a is pitzocheddos chi tenent disabilidades cognitivo-relatzionales, ddos bolet fàghere intèndere utilosos e parte de un’iscuadra prus manna. Pro issos est bellu a signare unu gol de importu, ma est fintzas prus bellu a fàghere un’assist a unu cumpàngiu.

Sàbadu is partidas de sa Divisione de fùbalu paralìmpicu e isperimentale ddas ant bidas su presidente de su Comitadu regionale Sardigna de sa Figc-Lnd, Gianni Cadoni, su responsàbile regionale de su progetu Dcps, Gian Piero Pinna, su delegadu provintziale de sa Figc, Manolo Costella, e s’assessore de s’Isport de su Comune de Aristanis, Antonio Franceschi.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2022-2023 – L.R. 22/2018, art. 22.

Più informazioni
commenta