Su Gazetinu, martis 31 de ghennàrgiu de su 2023
In Aristanis su Carrasegare 2023 s’abbiatzat. Su primu apuntamentu at a èssere giai su de giòbia 2 de freàrgiu, cun sa festa de Santa Maria de Candelas e sa cunsigna de is chìrios beneitos a su cumponidore de sa Sartìllia de su Grèmiu de is massajos Danilo Casula, a su de su Grèmiu de is maistros de linna Giampaolo Mugheddu e a su cumponidoreddu Lorenzo Carboni, chi imbetzes at a ghiare sa Sartilliedda cuncordada dae sa Pro Loco pro su lunis de Carrasegare.
Domìnigu 12 de freàrgiu, a mangianu, in Sant’Efis, don Alessandro Floris at a beneìghere a is cadderis e a is caddos de sa Sartìllia. A merie, imbetzes, ddoe at a èssere sa Sartìllia de canna, manifestatzione dedicada a is pipios chi ant a cùrrere acarotados cun is caddeddos de canna. Pro sa currera de is pipios su cumponidoreddu at a èssere Luca Flore. Pro sa festa de Carrasegare, is voluntàrios ant giai cuncordadu unos milli caddeddos.
Su 16 de freàrgiu, pro sa giòbia de lardajolu, ddoe at a èssere s’isfilada de is ludotecas peri is bias de is bighinados antigos de Aristanis. Custa isfilada ispassiosa in is ùrtimos duos annos non dd’aiant pòdida fàghere pro more de sa pandemia. E ddoe at a èssere fintzas sa tzipulada in pratza.
Domìnigu 19 e martis 21 de freàrgiu at a tocare a sa Sartìllia, cun in mesu sa Sartilliedda, in programma lunis 20.
E, cun sa torrada de sa currera a caddu de su connotu, arribant torra is passaditzos pro contare is persones chi s’ant a acostare a is pistas. Sa currera a s’isteddu dd’ant a pòdere bìere (cun presèntzia fìsica) non prus de 10.000 persones pro ònnia currera, mentras sunt unas 12.000 is chi, imbetzes, ant a pòdere castiare sa currera de is parìllias in bia de Mazzini. Su nùmeru de is ispetadores dd’ant istabilèssidu a tenore de su chi previdet s’ordinàntzia Gabrielli.
Is passaditzos pro intrare ant a èssere unos bìndighi e ddos ant a cuncordare intra de chenàbura 17 e sàbadu 18 de freàrgiu. Ant a contare a manera automàtica is intradas e is essidas.
Ant cunfirmadu fintzas su bandu, chi ocannu at a lòmpere a su de chimbanta anniversàrios. Ma sa Sartìllia ocannu dd’at a abbiatzare fintzas sa corte de Lionora de Arbaree. A giuighissa at a fàghere Marta Frau.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2022-2023 – L.R. 22/2018, art. 22.
commenta