Su Gazetinu, martis 24 de ghennàrgiu de su 2023 - LinkOristano
COMMENTA
CONDIVIDI
Su gazetinu

Su Gazetinu, martis 24 de ghennàrgiu de su 2023

Su Gazetinu

Su Gazetinu OK
Su Gazetinu

Su Gazetinu, martis 24 de ghennàrgiu de su 2023

Dae cras faghet a comporare in lìnia is billetes pro pòdere bìere sa Sartìllia imbeniente sètzidos in is tribunas de bia de Santa Maria e de bia de Mazzini. Is billetes ant a èssere a disponimentu, cumentzende dae is deghe de mangianu, in sa pàgina Sartiglia.info, chi dd’ant annoadu sa gràfica e dd’ant otimizada pro dda pòdere bìere dae pc, tablet e telefoneddu.

Dae lunis 13 de freàrgiu is billetes ddos ant a bèndere fintzas in sa sea de sa Fundatzione Aristanis, in bia de Lionora de Arbaree.

Comente aiant giai naradu in is chidas passadas, is billetes pro is tribunas costant unu pagheddeddu de prus, pro more de su crèschere de totu is costos de cuncordu.

Eris, in prus, sa Fundatzione Aristanis at bogadu su manifestu de sa Sartìllia 2023. Dd’at fatu s’istùdiu gràficu Adwm de Valter Mulas. Su retratu de su Cumponidore de Santu Giuanni chi nde boddit s’isteddu cun s’istocu dd’at tiradu Stefano Orrù.

In s’albo pretòriu de su Comune de Aristanis ant publicadu s’ordinàntzia chi at a regulamentare sa tzirculatzione pro custa Sartìllia. Is primos proibimentos de firmada e de passada in sa bia de Santa Maria e de Vittorio Emanuele II ant a mòvere, si serbit, giai dae giòbia chi benit, 26 de ghennàrgiu, pro permìtere a is operajos de cumentzare a cuncordare is tribunas. Pro bia de Mazzini at a tocare a abetare a su 6 de freàrgiu, mentras dae su 14 de freàrgiu ant a mòvere is proibimentos de firmada e de passada in pratza de Cova, bia de Riccio, bia de Diego Contini e bia de Benedetto Croce, in ue ddoe ant a cuncordare sa “Biddighedda Sartìllia”.

Is mudaduras a sa tzirculatzione in bia de Casteddu, imbetzes, ant a mòvere su bèsperu de sa Sartìllia, dae sa una de sàbadu 18 de freàrgiu. A manera particulare, si prevident su proibimentu de passada e de firmada in su tretu intra de bia de Pira e bia de Tharros, ma fintzas su sensu ùnicu de caminu cara a sud in su tretu intra de bia de Amsicora e Gennargentu e bia de Pira. Ddoe at a èssere puru su sensu ùnicu de caminu cara a nord in su tretu intra de bia de Tharros e bia de Diaz.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2022-2023 – L.R. 22/2018, art. 22.

Più informazioni
commenta
accedi
Su Gazetinu
Tutte le notizie
Su Gazetinu, lunis 22 de abrile de su 2024

Su Gazetinu, lunis 22 de abrile de su 2024

Is setziones Avis de sa regione s’addòbiant in Casteddu Sardu – Is voluntàrios de is setziones Avis de Sardigna si sunt addobiados eris in Casteddu Sardu pro sa de 53 assembleas annuales de s’Avis regionale, chi est istada fintzas s’ocasione pro faeddare de sa situatzione de is donatziones de sàmbene in s’Ìsula.

In su 2023 in Sardigna ant fatu 80.459 donatziones e, de custas, sa bellesa de 56.917 regortas dae is voluntàrios de s’Avis. Nùmeros incoragidores, si si pensat chi in su 2022 is sachitas fiant istadas 1381 in mancu.

Ma, mancari custos datos lassent isperare in bonu, s’Ìsula est ancoras in suferèntzia e ddi benit a mala bògia a importare sachitas de sàmbene pro parare fronte a sa domanda manna de sàmbene. Si contat, difatis, chi su bisòngiu regionale de ocannu passadu siat istadu de unas 110.000 sachitas, chi at fatu a ddoe parare fronte cun 80.000 donatziones de is sardos e 30.000 sachitas arribadas dae àteras regiones.

“Su de bastare dae sese pro su chi pertocat su bisòngiu regionale non depet èssere una chimera, ma sa raja de unu caminu istabilèssidu, in ue onniunu chi faghet parte de su sistema depet tènnere craru su rolu suo e, su pròpiu, depet tènnere craru sa tarea chi depet fàghere”, at naradu su presidente de s’Avis regionale Sardigna, Vincenzo Dore, invitende a totu is tzitadinos a èssere responsàbiles.

Comente a semper, su traballu de s’Avis in sa regorta de sàmbene est de importu, cun fainas meda e dies dedicadas a sa donatzione. “S’impignu nostru isceti in unu sistema cumplessu comente a cussu regionale non podet bastare”, at sutaliniadu Dore. “Bolemus torrare a espressare sa disponibilidade a traballare a manos de pare cun sa Giunta Todde, presentare is domandas e is progetos nostros pro parare fronte a manera funguda a totu is chistiones de su sistema regionale de sa regorta de su sàmbene”.

“Su de donare est una faina manna de bonucoro chi podet sarvare vidas meda”, at acabbadu su presidente Dore. “Su de fàghere parte de s’Avis bolet nàrrere a s’agatare in una cambarada de amigos impignada in s’isparghidura de is valores de su bonucoro, de sa tzitadinàntzia ativa e de sa cultura de su donu, prus che totu intra de is generatziones noas”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.