Su Gazetinu, mèrcuris 30 de onniasantu de su 2022
Lìtera de su prefetu – Su prefetu de Aristanis Fabrizio Stelo at iscritu una lìtera a is sìndigos de sa provìntzia de Aristanis, a su cummissàriu istraordinàriu de sa Provìntzia Massimo Torrente e a su diretore de s’Ufìtziu iscolàsticu regionale, pro chi isfrutent is oportunidades chi arribant dae su Pranu natzionale de mòvida noa.
Stelo at bòfiu regordare s’atentu pro s’arriscu chi si curret in is fràigos de is iscolas, prus che totu in cussos betzos, pro more fintzas ca is averiguaduras chi pertocant sa seguresa non semper sunt lestras.
Su prefetu at sutaliniadu s’importu de fàghere averiguaduras che is fadosos in is fràigos, “pro bìere si sunt seguros, pro nde fàghere essire a pìgiu problemas eventuales e pro megiorare, si serbit, sa seguresa de is istudiantes e de totu cussos chi abitant is iscolas”.
“Domando a totus de si nde incurare de sa chistione cun atentu mannu”, at acabbadu in sa lìtera su prefetu de Aristanis Fabrizio Stelo. “S’iscola est e depet èssere su logu prus seguru e non ddoe podent acontèssere disgràtzias pro more de su pagu incuru pro is fàbbricos”.
Die de abertura – Domìnigu, dae is noe e mesu de mangianu a is duas e dae is tres de merie a is chimbe e mesu, s’Istitutu de Istrutzione Superiore “Don Deodato Meloni” aberit is ghennas a is istudiantes chi si ddoe bolent iscrìere e a is famìllias issoro.
Sa Die de abertura at a pertocare sa sea de Nuraxinieddu pro s’indiritzu Agràriu, sa sea de bia de Carducci pro s’indiritzu Alberghieru e sa sea de arborada de Diaz pro is indiritzos Odontotècnicu e pro is Servìtzios sotziales.
Pro àteros informos faghet a telefonare a is professoras Anna Laura Canetto (349/4245701) e Michela Floris (339/6605800).
Is babbos e is mamas podent prenotare sa bìsita de s’Istitutu e de su Cunvitu in cale si siat die.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
commenta