Su Gazetinu, giòbia 29 de cabudanni de su 2022
In s’ispidale Santu Martinu de Aristanis, pro sa prima borta in Itàlia, sa cambarada de s’Istrutura cumplessa de Cardiologia at fatu un’interventu ispantosu. A una persone chi tenet una maladia rara, sa distrofia musculare de Becker, dd’ant cuncordadu unu trastu pro regulare sa contrabilidade de su coro, est a nàrrere sa manera comente totu su coro s’istringhet impitichende-si e s’ismànniat. Custu trastu megiorat su funtzionamentu de su coro e non faghet andare a in antis sa maladia.
S’interventu, chi non fiat simpre pro more de is cunditziones de su malàidu, dd’at fatu sa cambarada de aritmologia e cardiuapretu de s’Unidade operadora de Cardiologia, ghiada dae su diretore Francesco Dettori e agiudadu dae is àteros cumponentes de sa cambarada, is dotores Giampaolo Sanna e Sara Frascaro e is infermieras Caterina Angioi e Francesca Faedda.
“Amus isperimentadu intra de is primos s’impreu de tecnologias noas pro custa genia de maladia”, at naradu su diretore de su repartu de Cardiologia. A su malàidu, chi istat bene, immoe dd’ant pigadu in càrrigu s’ambulatòriu chi si nde incurat de s’iscumpensu cardìacu e su laboratòriu de ecocardiugrafia de II livellu, chi faghent parte de s’istrutura cun is dotores Marina Meloni, Simona Aramu, Laura Sanna, Franca Liggi, Stefania Palmas, Giuseppina Giau”.
Sa distrofia musculare de Becker est una maladia genètica chi interessat a unos tres òmines ònnia 100.000 abitantes. Intra de is cunsighèntzias batit sa cardiumiopatia islargadora e s’iscumpensu cardìacu. Su piessignu suo est ca is àteras terapias serbint a pagu cosa e, in custa genia de malàidos, su prus de is bortas non faghet a fàghere su trapiantu. Pro cussu gente meda si nche morit giòvana.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
commenta