Su Gazetinu, mèrcuris 28 de cabudanni de su 2022
A intro de su 2100 su Golfu de Aristanis diat pòdere èssere a suta de s’abba: cun unu livellu de su mare prus artu de 84 tzentìmetros cunforma a su de oe, diat isparèssere su 40% de is prajas arenosas, cun una pèrdida chi diat pòdere acontèssere pro su territòriu de 16 milliones de èuros in su setore de su turismu.
Custa est una de is previsiones de su progetu Wetland-Based Solutions chi at bogadu unu vìdeu acraradore chi mustrat Santu Giuanni de Sinis, in ue sa praja a suta de sa turre est totu ammantada dae s’abba.
Su progetu interessat prus de 30 assòtzios ispetzializados in zonas ùmidas, cun sa punna de sarvare, torrare che a prima e gestire custos ecosistemas de importu de su Mediterràneu.
E dae su sarvamentu e dae sa torrada che a prima de is zonas ùmidas dipendet sa possibilidade de ismenguare s’undamentu de su mare, cun totu su dannu mannu chi nde diat nàschere pro s’economia, pro sa seguresa alimentare e pro sa salude de is tzitadinos. Ma meda dipendet fintzas dae su torrare a pensare a totu cussas fainas de s’òmine chi favoressent sa mudadura de su clima.
“Su Mediterràneu dae su 1970 at pèrdidu prus de su 50 % de is zonas ùmidas suas naturales, pro more de formas de isvilupu pensadas male e de s’impreu de s’abba in agricultura”, si leghet in sa pàgina Internet Wetland-Based Solutions. “Sigomente sa mudadura de su clima sighit, aici etotu comente sa crèschida de sa populatzione, su de sarvare e torrare che a prima su chi abarrat de custos logos ùnicos est una cosa pretzisa meda. Ma custu non podet acontèssere a dannu de s’isvilupu sotziueconòmicu”.
“Su de assegurare sa sighidura de is zonas ùmidas nostras in totu sa Sardigna est una tarea de importu chi nche bolet sa collaboratzione dae parte de totu is paisos de su Mediterràneu”, si leghet ancoras. “Sa Sardigna nde tenet medas de zonas ùmidas in is costeras suas e diat tocare a ddas amparare, pro ismenguare custos arriscos”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
commenta