Su Gazetinu, giòbia 1 de cabudanni de su 2022
Cumentzat oe cun duos apuntamentos su “Cabudanni Aristanesu”, unu calendàriu ricu cun prus de trinta addòbios gratis intra de arte, cultura, ispetàculu e fide.
A is sete e mesu de merie s’iscritore Francesco Abate at a èssere in sa pratzighedda de s’Antiquarium Arborensu pro presentare “Il complotto dei Calafati”. A càbudu de chena, imbetzes, a is noe oras, in su teatru Santu Martinu, nche at artziare a su palcu su Duo Sardo, formadu dae sa sonadora de clarinetu Lucia Porcedda e dae su pianista Battista Melis.
Su “Cabudanni Aristanesu” ddu cuncordant s’Assessoradu de sa Cultura, de su Turismu e de s’Ispetàculu de su Comune de Aristanis, paris cun s’Assessoradu de s’Isport e de su Turismu isportivu, a manos de pare cun s’Assessoradu de is Fainas produsidoras. Ma sa rassigna si balet fintzas de s’agiudu de sa Pro Loco e de sa Fundatzione Aristanis.
De importu mannu est sa festa pro regordare su de 70 anniversàrios dae s’incoronamentu de s’istàtua de Nostra Sennora de su Remèdiu, sa festa pro Santa Rughe e cussa pro Sant’Efis.
Ma protagonista at a èssere fintzas s’isport. In custa coa de chida s’atentu at a èssere totu pro su torneu internatzionale de basket Tzitade de Aristanis, cun sa Dinamo Tàtari in su parquet de Sa Rodia paris cun su Mònacu, s’Hapoel Tel Aviv e su Cedevita Olimpja Lubiana. S’at a cùrrere fintzas un’editzione ispetziale de sa Mesu Maratona de su Giuigadu, domìnigu 18 de cabudanni. E su 24 e 25 de cabudanni, in Turri Manna, ddoe ant a fàghere s’Open Water Challenge.
Sàbadu 17 e domìnigu 18 ant a èssere duas dies dedicadas a su Romànicu sardu, cun s’abertura de s’Oratòriu de is Ànimas de Màssama.
Si previdet una ventana fintzas cara a sa mùsica eletrònica cun “Àmana”, sonos intra de terra e chelu: sàbadu 24 de cabudanni dj set e triu de arcos cun Giangi Cappai in sa turre de Marianu II.
Is manifestatziones de cabudanni ant a agabbare intra de su 29 de cabudanni e su primu de su mese de ledàmene in s’Hospitalis Sancti Antoni cun su Fèstival de su Gustu, cuncordadu dae Confesercenti e Slow Food.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
commenta