Su Gazetinu, chenàbura 19 de austu de su 2022
Coltivos de istadiale – Dae is situatziones de crisi e de dificultade puru, a bortas, nde podent nàschere esperièntzias virtudosas. Est su chi acontesset cun is coltivos de foràstigu, melone e tomata pro s’indùstria chi faghet cunserva, in is cussòrgias de Sardigna in ue custas genias de coltivos e sa fogimenta in generale ddoe faghent mègius.
“Sa crèschida manna de is costos de produsimentu, intra de carburante agrìculu, energia, contzime, matedu pro vivaju, sa mancàntzia de manobreria e sa timoria de proibimentos noos pro more de sa pandemia, chi diant àere nòghidu a su setore de su turismu e de sa ristoratzione, at portadu a massajos meda a ismenguare sa sèmena de unos cantos produsimentos”, narat su presidente de Confagricoltura Sardigna, Paolo Mele, faeddende de is datos regortos in custas chidas dae s’organizatzione agrìcula. “Cun su melone e cun su foràstigu amus connotu un’ismèngua intra de su 20 e su 25% de is terras prenas, mentras pro su chi pertocat sa tomata pro s’indùstria s’ismèngua est istada de prus de su 35%. S’ismèngua chi s’est connota in is regortas at fatu a manera ocannu de guvernare su mercadu cun prètzios chescedosos pro is massajos, evitende in prus – comente no acontessiat dae tempus meda – de nche fuliare sa fruta chi abarraiat firma in is magasinos, pro ite ca is butegas non nde domandaiant”.
Custu resurtadu bellu de su “isperdìtziu nudda” e de sa bèndida a prètzios bellos pro is massajos s’est otentu fintzas pro more de s’ismèngua de is produsimentos in logos meda de Terramanna, prus che totu in su nord, permitende aici a is siendas sardas de acuntentare su mercadu locale e de acuntentare fintzas sa domanda de is mercados de cudda ala de su Tirrenu. In prus, sa fògora chi at piessignadu custa istajone, fintzas a s’infriscada chi amus connotu in custas dies, at favorèssidu sa calidade bona de is prodùsidos de is sartos de Sardigna.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
commenta