Su Gazetinu, giòbia 11 de austu de su 2022
Is vatzinos non ddos faghent prus in su Palatzieddu de s’isport – Su Tzentru de Aristanis pro is vatzinos contras de sa Covid-19 no at a èssere su Palatzieddu de s’isport nou de Sa Rodia. A su mancus fintzas a cabudanni is vatzinatziones ddas ant a fàghere in bia de Carducci, in is ambulatòrios de igiene e Sanidade pùblica de sa Asl.
A pustis, cando ant a arribare is vatzinos noos, s’at a agatare un’àteru logu. E de seguru no at a èssere su Palatzieddu de s’isport, chi est istadu su Tzentru pro is vatzinatziones dae su mese de abrile de su 2021 a su mese de maju de su 2022.
Sa Asl e su Comune de Aristanis sunt chirchende sa sea adata, unu locale chi forsis at a èssere prus piticu de su Palatzieddu de s’isport, cunsideradu chi su bisòngiu de tènnere a disponimentu logos mannos est mudadu. Dd’at cunfirmadu dotora Maria Valentina Marras, diretore de su Servìtziu de Igiene e Sanidade pùblica de sa Asl de Aristanis.
In custa simana, in bia de Carducci, non si connoschent dificultades mannas nen fileras de persones abetende pro ddis fàghere sa de bator doses. Ònnia die, difatis, si faghent non prus de chentu vatzinos. Is ambulatòrios de Igiene e Sanidade pùblica sunt abertos dae su lunis a sa chenàbura, dae is noe oras de mangianu a sa una, e su martis e sa giòbia fintzas a merie, dae is tres a is ses. S’ambulatòriu pro is vatzinatziones at a abarrare serradu lunis 15 de austu, ma at a torrare a abèrrere sa die in fatu.
A is ambulatòrios faghet a ddoe intrare sena de prenotare. Ma, pro chie bolet, faghet comente si siat a prenotare cun su sistema de Poste Italiane.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
commenta