Su Gazetinu, lunis 16 de maju de su 2022
Sunt bator is candidados pro sa càrriga de sìndigu chi su 12 de làmpadas imbeniente ant a fàghere a trivas pro sa ghia de su Comune de Aristanis. A Filippo Murgia dd’agiudat sa lista tzìvica “Aristanis, identidade e connotu”. Sergio Locci, imbetzes, podet gosare de s’agiudu de sa lista tzìvica “Aristanis, pro fraigare su tempus benidore nostru”.
Su Tzentru-Manca at seberadu a Efisio Sanna, agiudadu dae Pd, Psi, “Aristanis democràtica e possìbile”, “Pro Efisio Sanna Sìndigu”, “Manca de su benidore pro Aristanis” e “Movimentu Aristanis”, custa ùrtima lista acanta de su Movimentu de is Chimbe Isteddos.
Su Tzentru-Dereta, in fines, at candidadu a Massimiliano Sanna, chi tenet s’agiudu de sete listas: sa de is Riformadores, sa de is Frades de Itàlia, sa de Fortza Itàlia, sa de Sardigna 20Binti, sa de su Psd’Az, sa lista “Aristanis in su Tzentru – UDC” e sa de is Populares Europeos. In Aristanis sa Lega no at presentadu lista peruna, ma unos cantos candidados de sa Lega sunt presentes in sa lista amiga de su Psd’Az.
Una curiosidade: in Aristanis su candidadu a consigieri prus betzu est Costantino Contini, macumeresu de norantatrès annos, chi s’est candidadu in una lista in favore de Efisio Sanna.
Totu is 15 listas ant otentu su lassa-passare de sa Cummissione tzircundariale eletorale. Oe ant a tirare a billetes su nùmene de is sìndigos e cussu de is listas pro sa ponidura in s’ischeda eletorale.
In provìntzia de Aristanis, a pustis de su cummissariamentu, su 12 de làmpadas si torrat a votare in Nureci, Sèneghe e Zrofolliu, in ue ant presentadu pro is eletziones una lista isceti. Su pròpiu in Gonnacodina, in ue però is listas chi faghent a trivas sunt duas.
In Aidumajore, Milis, Mogoredda, Siamanna, Tinnura e Tresnuraghes ant presentadu una lista isceti.
In Ardaule, Boàtiri, Bauladu, Mragaxori, Sàgama, Sèdilo e Terraba is listas chi current, imbetzes, sunt duas. In Uras, in fines, is listas chi ant a pedire sa preferèntzia de is eletores sunt tres.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
commenta