Su Gazetinu, mèrcuris 12 de ghennàrgiu de su 2022 - LinkOristano
Su gazetinu

Su Gazetinu, mèrcuris 12 de ghennàrgiu de su 2022

Su Gazetinu

Su Gazetinu OK
Su Gazetinu

Su Gazetinu, mèrcuris 12 de ghennàrgiu de su 2022

Emergèntzia Covid-19 – Eris a merie est mortu in su Prontu Sucursu de s’ispidale de Aristanis unu de is malàidos de Covid-19 ricoverados e chi non fiant resèssidos a tramudare a is repartos ispetzializados de s’ìsula. Teniat 89 annos e is cunditziones de salude suas, giai dae s’intrada a su Prontu Sucursu, fiant graves meda.

Eris is malàidos de Covid presentes in su Prontu Sucursu fiant 8. Si ddoe bivet una situatzione de emergèntzia, pro more de sa dificultade a transire a is ispidales atretzados is malàidos chi s’agatant oramai in ie dae unas cantas dies. Si sunt ingendradas situatziones de pillissos mannos, de tale manera de fàghere a tìmere sa serrada de su servìtziu, chi est abarradu abertu gràtzias a sa disponibilidade e bona voluntade de su personale chi ddoe traballat.

Naschet dae inoghe su determinu de s’Asl de Aristanis chi at apostivigadu pro lunis de chida chi benit s’abertura torra de su repartu Covid de s’ispidale Delogu de Ilartzi. Dd’ant a cuncordare in su repartu betzu de Meighina, in ue dd’aiant giai abertu ocannu passadu.

In custas oras in Ilartzi sunt giai liberende su repartu de Meighina. Su prus de is malàidos chi ddoe sunt ricoverados diant dèpere tramudare a s’ispidale Mastino de Bosa, chi at a pònnere a disponimentu 30 letos non Covid a ue at a pòdere tramudare una parte de is ricoverados de su repartu de meighina de Aristanis, prenu che a un’ou.

Su pranu istudiadu dae sa Asl previdet su tramudu dae Aristanis a Ilartzi de tres mèigos chi ant a ghetare una manu de agiudu in su contivìgiu de su repartu Covid a is collegas issoro ilartzesos: duos internistas e unu chirurgu.

Ma tocat a agatare a àteros mèigos chi potzant parare fronte a is bisòngios de s’ispidale Mastino de Bosa.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2021-2022. LR 22/2018, art. 22

commenta