Su Gazetinu, chenàbura 31 de nadale de su 2021
E un’àteru annu est passadu! – “Abba passada no tirat mòlinu”, narat unu ditzu sardu. Est berus! Ma s’abba, passende, su mòlinu dd’at fatu mòere e comente! Paret chi nch’at coladu un’iscutighedda dae cando, su 29 de nadale de su 2020, aiamus cumentzadu custa esperièntzia de “SU GAZETINU”, cun s’agiudu de su Servìtziu “Limba e Cultura sarda” de sa Regione. Un’annu si nch’est boladu!
Amus abertu in sa prima pàgina de su giornale in lìnia nostru una ventana cara a is chistiones de polìtica, economia, iscièntzia, ambiente, cultura e isport de sa Sardigna e de sa provìntzia de Aristanis. Dd’amus fatu pro bos informare in contu de is acontèssidos prus de importu e dd’amus fatu in sardu. Eja, in sardu! Ca sa punna nostra e de sa Regione est a fàghere a manera chi sa limba istòricu identitària nostra torret ‘normale’ in sa vida de ònnia die, est a nàrrere chi s’impreet in ònnia logu, in cale si siat cuntestu de comunicatzione e, duncas, fintzas in is òrganos de informu. Ischende fintzas chi s’iscola in Sardigna, mancari sa Regione apat dadu inditos craros profetosos a s’Ufìtziu iscolàsticu regionale, sighit a alfabetizare a is Sardos in italianu isceti, e no in sardu puru. Est craru chi, dae custa chèscia, si sarvat una filera semper prus manna de dirigentes de iscola, maistros e professores abistos chi su dovere issoro in contu de sa limba ddu sunt faghende! E a Issos non nos amus a istracare mai de ddis torrare gràtzias pro su chi sunt faghende pro afortiare sa limba, sa cultura, s’identidade culturale de is Sardos! Ma totu custu non bastat, si s’impreu e s’imparòngiu de su sardu in s’iscola non si tramudat in una faina de sistema.
Su de iscrìere fintzas in sardu, duncas, su chi at fatu e at a sighire a fàghere LinkOristano, nos podet agiudare a nos nche torrare a pònnere meres de sa limba nostra, chi non bolet nàrrere a iscrìere (e a lèghere) in sardu isceti, ma a iscrìere (e a lèghere) in sardu puru, acostagende su sardu a s’italianu e a totu is àteras limbas chi cherimus.
Su Gazetinu, semper gràtzias a s’agiudu de sa Regione Sarda, at a sighire pro totu su 2022. Deo, cun totu sa Redatzione de LinkOristano, bos torramus gràtzias pro nos àere fatu cumpangia in custu annu chi amegat de si nche essire: a nche dd’agabbare de passare comente totu disigiades! E respetende is règulas pro bìnchere sa Covid-19, ca tantu dd’amus cumpresu chi nos at a acumpangiare fintzas ocannu chi benit e bae chirca pro cantos àteros annos ancoras.
Cun s’ispera e s’augùriu dae coro chi su 2022 siat un’annu sulenu, ditzosu, de salude e de paghe pro totus, a prus a prus pro chi nde ddi bisòngiat!
A nos torrare a lèghere cun salude! S’apuntamentu est a lunis 3 de ghennàrgiu de su 2022.
Antoni Nàtziu Garau
commenta