Su Gazetinu, lunis 20 de nadale de su 2021
Laboratòrios in contu de su Romànicu sardu – Unu laboratòriu culturale pro ispàrghere sa connoschèntzia de su Romànicu in Sardigna. Est sa faina promòvida dae sa Fundatzione “Sardigna Ìsula de su Romànicu” pro sa simana de Paschighedda, cun unu caminu creadore pensadu a forma de laboratòriu didàticu culturale, chi ddi narant “Su Romànicu in un’App”.
Dae su 27 a su 29 de nadale, dae is ses de merie a is oto, s’at a pòdere pigare parte a is cambaradas de traballu in una prataforma in lìnia, in ue s’ant a pòdere connòschere mègius 15 crèsias de su Romànicu sardu.
Sa partetzipatzione est gratis e aberta a totus. Pro s’iscrìere a su laboratòriu “Su Romànicu in un’App” tocat a mandare una e-mail a s’indiritzu info@romanicosardegna.org.
Su trenigheddu de Paschighedda – Cras ant a mòvere is biàgios de su trenigheddu de Paschighedda peri su tzentru de Aristanis.
Ocannu puru su billete dd’oferit sa cadena de ispainamentu nòdida CRAI, acapiada a istrintu a sa tzitade e a su territòriu suo.
Su trenigheddu at a biagiare fintzas a su 29 de nadale, francu in is dies de su 25 e 26 de nadale.
Dae is tres a is sete de merie, su trenigheddu at a mòvere dae pratza de Roma, dae ue at a cumentzare sa passigiada peri is bias de sa tzitade.
In una parada a s’aposta, cuncordada in sa pratza, at a fàghere a si frunire de is billetes pro is biàgios.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta