Su Gazetinu, domìnigu 19 de nadale de su 2021
Aristanis, isfilada de is personàgios prus nòdidos de sa Disney – Su tzentru istòricu de Aristanis at a acasagiare cras un’isfilada manna de is personàgios prus nòdidos de sa Disney chi, a pustis, s’ant a agatare totus in su teatru Garau. Sa faina, chi bolet favorèssere su presu de pipios e de mannos, dda cuncordat s’Assessoradu de sa Cultura, Turismu e Ispetàculu de su Comune de Aristanis, ghiadu dae Massimiliano Sanna, a manos de pare cun sa Fundatzione Aristanis, cun sa Pro Loco, cun sa Fundatzione de Sardigna e cun s’Unicef, chi at a regòllere is ofertas chi acumpàngiant is fainas de custa Paschighedda.
Su “Musical show magic cartoons”, chi faghet parte de is manifestatziones de sa “Paschighedda paris cun s’Unicef”, at a cumentzare a is chimbe in pratza de Tzitade, dae ue ant a mòvere is personàgios chi ant a abbiatzare is rugas e is pratzas de su tzentru antigu de Aristanis. A is ses e mesu, in fines, s’addòbiu in su teatru Garau, in ue s’intrada est gratis, ma tocat a prenotare telefonende a sa Pro Loco (0783.70621). Si cumprendet chi totu sa manifestatzione s’at a fàghere respetende is règulas pro firmare s’isparghidura de sa Covid-19: a intro de su teatru, duncas, serbit a si pònnere sa mascheredda, mentras is mannos ant a dèpere mustrare su Tzertificadu birde.
“Amus chèrfidu pensare a una festa pro totu is pipios cun unos cantos personàgios chi issos istimant de prus: dae Topolino a Paperino, dae Minnie a Pluto, ma fintzas Elsa e Olaf de Frozen e àteros”, narat s’assessore Massimiliano Sanna. “Pro chistiones de seguresa e pro favorèssere sa partetzipatzione de pipios meda, onniunu de issos podet èssere acumpangiadu dae non prus de una persone manna”, atzunghet s’assessore Sanna.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta