Su Gazetinu, domìnigu 12 de nadale de su 2021
Aristanis, una faina de bonucoro pro acumprire su disìgiu de Giulia Zedda – Su disìgiu de una pipia de deghe annos, Giulia Zedda, chi at gherradu cun atza contras de unu càncaru in su cherbeddu chi dd’at morta, si faghet realidade gràtzias a sa Pro Loco de Aristanis, ghiada dae Gianni Ledda.
Difatis, ocannu s’assòtziu de promovimentu culturale e turìsticu aristanesu at pigadu su determinu de agiudare pro custa Paschighedda s’assòtziu “Su bisu de Giulia Zedda”, nàschidu in su 2018 pro pònnere cambas a su disìgiu de custa pipia chi, in antis de s’arrèndere a sa maladia chi si nche dd’at leada, boliat agiudare a totu is pipias e is pipios prus pòberos de issa e chi no si podent permìtere de tènnere is giogos e is àteros istentos chi teniat issa.
E, duncas, fintzas a chenàbura 17 de nadale sa Pro Loco aristanesa at a retzire, in sa sea sua de bia de Ciutadella de Menorca n. 14, giogos, gioghitos, costrutziones, giogos de sotziedade, ma fintzas materiale utilosu pro s’iscola comente a cartolàrios, album pro disinniare e pintare, colores, lapis, gommas, pinnas, etc.
Totu is cosas chi su bonucoro mannu de is tzitadinos de sa provìntzia de Aristanis at bòlere donare pro custa faina nòbile, sa Pro Loco dd’as at a dare a s’assòtziu “Su bisu de Giulia Zedda”. Sa Pro Loco aristanesa est aberta dae su lunis a sa chenàbura, a mangianu dae is noe oras a sa una, a merie dae is tres a is sete.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta