Su Gazetinu, sàbadu 4 de nadale de su 2021
Artes e Sabores in su tzentru antigu de Santu Lussurzu – In custa coa de chida sa manifestatzione Artes e Sabores abbiatzat is carreras de su tzentru istòricu de Santu Lussurzu. Unu signale pro marcare sa mòvida noa a pustis de un’annu e mesu de emergèntzia pro sa pandemia de su Coronavirus e a pustis de un’istadiale nieddu, cun su fogu chi si nd’at papadu una parte manna de su Monteferru.
Sa rassigna, lòmpida ocannu a sa de chimbe editziones, dda cuncordat s’Amministratzione comunale, a manos de pare cun is produsidores lussurzesos e cun sa Pro Loco. In s’editzione 2021 sa parte de sa bidda interessada de prus dae sa manifestatzione est cussa antiga, in ue privados meda ant abertu is domos issoro pro contare a su pùblicu su connotu enogastronòmicu e culturale de custu logu de Monteferru.
Sunt prus de 50 is produsidores chi oferint a is bisitadores is produsimentos issoro.
Is paradas sunt abertas oe e cras dae is 10 de mangianu fintzas a su note. In ambas duas is dies de sa rassigna cantos e baddos de su connotu ant a abbiatzare is bias de su tzentru istòricu.
Oe s’ant a pòdere bìere fintzas artistas de carrera e gioghistas.
In prus si podet bisitare su caminu urbanu “Is passos de Gramsci” e sa mustra fotogràfica in contu de su Carrasegare lussurzesu “Punghe e Regolle”.
Antoni Nàtziu Garau
commenta