Su Gazetinu, mèrcuris 1 de nadale de su 2021
In provìntzia de Aristanis est cumentzadu su faghimentu de is vatzinos contras de s’influèntzia: si nde incurant is mèigos de famìllia. Is doses domandadas ddas ant cunsignadas chenàbura passada a is mèigos de meighina generale de su distretu sanitàriu de Aristanis e a cussos chi traballant in Guiltzier.
Oe tocat a sa Pianalza, a su Monteferru e a is mèigos de su distretu sanitàriu de Abas-Terraba.
Dae chida chi benit at a fàghere a si vatzinare contras de s’influèntzia de istajone fintzas in potecaria. S’Assessoradu regionale de sa Sanidade ghiadu dae Mario Nieddu e Federfarma Sardigna ant istabilèssidu s’acòrdiu pro su faghimentu de s’antinfluentziale in is potecarias. Pro pònnere cambas a s’acòrdiu mancat sa delìbera de sa Giunta regionale isceti.
Su presidente de Federfarma Sardigna Pierluigi Annis at fatu a ischire chi is vatzinos diant èssere disponìbiles fache a su 7 de nadale. Pro immoe in provìntzia de Aristanis sunt unas baranta is potecarias chi pigant parte a sa campànnia de vatzinatzione, mentras in Sardigna sunt unas 300 is potecarias imbideadas a incarrerare su servìtziu.
In su pròpiu tempus sighit sa campànnia de vatzinatzione contras de sa Covid-19. Sa Sardigna est sa prima regione in Itàlia pro is vatzinatziones in sa fasca de edade intra de 12 e 19 annos. Su 76,8 % de is giòvanos residentes in s’ìsula nostra, difatis, at acabbadu su tziclu de vatzinatzione.
In prus, in custa ùrtima chida est creschende su nùmeru de is vatzinados chi ant detzisu de fàghere sa prima dose. Est creschende fintzas su nùmeru de is doses de afortiamentu, arribadas in totu a 144 mìgia, cun una mèdia de 10 mìgia vatzinatziones ònnia die in custa ùrtima chida.
Antoni Nàtziu Garau
commenta