Su Gazetinu, chenàbura 26 de onniasantu de su 2021 - LinkOristano
Su gazetinu

Su Gazetinu, chenàbura 26 de onniasantu de su 2021

Su Gazetinu OK
Su Gazetinu

Su Gazetinu, chenàbura 26 de onniasantu de su 2021

Abba e nie: perlongadu s’allerta in Sardigna – S’allerta mèteu pro s’undada de tempus malu chi est interessende sa Sardigna, chi est betende abba, frius e su primu nie de s’istajone, dd’ant perlongadu fintzas a cras a mesudie. S’avisu de istare a s’abbista previdet unu còdighe grogu cun crititzidade normale pro arriscu idràulicu/idrogeològicu in Campidanu, Montibèciu-Pischinàpiu, Tirsu e Logudoro.

S’avisu previdet sa crititzidade normale, semper cun còdighe grogu, pro arriscu idràulicu ebbia in sa zona de Igrèsias.

In Sardigna ant fatu mòvere fintzas su Pranu pro su nie e s’Amparu tzivile regionale at frunidu is inditos pro custas situatziones. Òmines e mezos sunt prontos a intervènnere. A manera particulare a is Comunes de Dèsulu e de Fonne ddis ant assignadu duos autocarros Magirus 150, frunidos de pàlia pro nche retirare su nie, a su Comune de Biddamanna unu Ford Ranger 110, mentras a su Comune de Ollollai dd’ant dadu unu Land Rover 110.

A custos mezos s’atzunghent deghessete Land Rover 110, frunidos de pàlia transi-nie e isparghe-sale, dados in comodadu de impreu dae s’Amparu tzivile regionale a is Organizatziones de voluntariadu chi traballant in is zonas regionales in ue s’arriscu de su nie est prus artu.”

S’Amparu tzivile regionale, in prus, at dadu in comodadu de impreu unos cantos mezos operadores a s’Agentzia Forestas. “S’Agentzia”, at naradu s’assessore regionale de s’Ambiente Gianni Lampis, ”est a disponimentu pro assegurare sa presèntzia, sa pulidura de is bias e de is logos prus traficados”.

Antoni Nàtziu Garau

—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

commenta