Su Gazetinu, giòbia 25 de onniasantu de su 2021
Regulas noas pro s’emergèntzia de su Coronavirus – Pro s’emergèntzia de su Coronavirus intrant in vigèntzia règulas noas. Eris su Guvernu at aprovadu su chi ddi narant “Super tzertificadu birde”. Dd’ant a pòdere otènnere is chi sunt sanados dae sa maladia o is chi sunt vatzinados. In prus, at a tènnere una dura de 9 meses e non de 12.
Su tzertificadu birde de immoe otentu cun s’esàmene de su tampone at a fàghere a dd’impreare isceti pro andare a traballare, a palestra, pro corcare in albergo o pro impreare is mezos pùblicos.
Dae su 6 de nadale imbeniente e fintzas a su 15 de ghennàrgiu is immunizados e is negativizados chi tenent su super tzertificadu birde ant a pòdere intrare a is locales pùblicos, comente a ristorantes e tzìnemas, ma fintzas discotecas, tzerimònias, etc.
Su Guvernu, in prus, at apostivigadu de cunfirmare su sistema de is zonas partzidas in colores diferentes, a tenore de su livellu de isparghidura de su virus e de sa situatzione in is ispidales.
In zona groga ddoe at a èssere s’òbligu pro totus de si pònnere sa mascheredda fintzas in logu abertu.
In is zonas grogas o in colore de arantzu s’intrada a is butegas e a is àteros locales pùblicos est permìtida a is chi tenent su super tzertificadu birde isceti.
In fines, dae su 15 de nadale intrat s’òbligu de si vatzinare pro is insegnantes e pro is fortzas de s’òrdine, mentras abarrat cunfirmadu pro su personale sanitàriu e pro cussu chi traballat in is Rsa, chi depet fàghere immoe sa de tres doses.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22