Su Gazetinu, martis 23 de onniasantu de su 2021
Tampones antigènicos: chèscia de is parapotecàrios – In potecaria faghet, mentras in is parapotecarias non si podet fàghere s’anàlisi de is tampones antigènicos contras de su Coronavirus: est una protzedura no autorizada. Immoe in provìntzia de Aristanis puru si pesat sa chèscia. Is titulares de is parapotecarias si chèsciant pro custu tratamentu diferente, aici etotu comente a is utentes meda chi ddos chircant, crèschidos de nùmeru in custa ùrtima simana, pro more de s’intrada in vigèntzia de su Lassapassare birde e de su bisòngiu de fàghere custa genia de averiguadura. In medas ddu diant bòlere fàghere in una parapotecaria, pro otènnere su resurtadu a lestru. Ma in custa genia de butegas no est permìtidu. Dae inoghe movet sa chèscia, acumpangiada dae sa domanda de mudare custa situatzione. Is parapotecàrios amegant de fàghere intèndere sa boghe issoro in maneras diferentes, fintzas in sa penìsula.
Una domanda cumpartzida dae Bruno Palmas, segretàriu natzionale de su Tribunale de is Deretos e de is Doveres de is Mèigos, chi in contu de custu at iscritu una lìtera a su ministru de sa Salude Roberto Speranza. Palmas faghet unu riferimentu craru a is lobbies chi cunditzionant sa solutzione de su problema e in sa lìtera mandada a su ministru si decrarat contras de custas diferèntzias interessadas e de is afarismos.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta