Su Gazetinu, martis 16 de onniasantu de su 2021
Sighit sa temporada e essit un’avisu nou de istare a s’abbista pro su tempus malu – Sa temporada non lassat sa Sardigna e oe est un’àtera die de pistighìngiu a pustis de s’abba meda de domìnigu chi at ingendradu fintzas unu mortu in provìntzia de Casteddu. S’Amparu tzivile regionale at bogadu un’àteru avisu de istare a s’abbista chi balet fintzas a mesunote de oe. Sa crititzidade prus manna si previdet ancoras in su Sud de s’ìsula, ma fintzas in provìntzia de Aristanis est mègius a èssere cautelosos e a istare a s’avèrtida. In Casteddu oe, pro sa de duas dies paris, sunt suspèndidas is fainas didàticas in s’Universidade e sunt serradas totu is iscolas, a prus de is asilos, parcos e impiantos isportivos.
Impeorat sa calidade de sa vida in provìntzia de Aristanis – Sa provìntzia de Aristanis perdet 13 positziones in sa classìfica particulare in contu de sa calidade de sa vida publicada dae su giornale Italia Oggi. S’agatat in sa de otantoto positziones, mentras ocannu passadu fiat in sa de setantaghimbe. Sa prima provìntzia sarda in classìfica est sa Tzitade metropolitana de Casteddu, chi est sa de setantabator, a pustis sighint Tàtari, sa de otantunu, Nùgoro in sa de otantaghimbe e su Sud de Sardigna in su de norantunu postos.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta