Su Gazetinu, domìnigu 14 de onniasantu de su 2021
Is programmas de s’Assòtziu Monteferru – In Cùglieri ant presentadu s’Assòtziu Monteferru. Punnat a promòvere s’abbiatzamentu de su patrimòniu chi pertocat s’olia e s’ògiu ermanu e s’amparu de s’ambiente de su Monteferru, logu interessadu a manera grae dae su fogu mannu de su mese de trìulas passadu. A s’addòbiu ddoe ant pigadu parte su presidente Pietro Paolo Arca, su diretivu, amministradores locales meda e rapresentantes de s’Unione de is Comunes de Monteferru.
Sunt giai medas is chi tenent interessu e chi ant dadu sa disponibilidade issoro a ghetare una manu de agiudu: dae universidades a tzentros de chirca, dae assòtzios pro s’amparu de su paesàgiu e de s’ambiente a assòtzios agrìculos e culturales, dae istudiosos a tzitadinos.
S’Assòtziu Monteferru at a promòvere luegos una regorta de dinari pro is fainas chi pertocant s’abbiatzamentu de is matas de olia e de su territòriu, cumentzende dae sa còmpora de matigheddas de olia pro ddas prantare in is tretos passados in fogu e de àteru matedu, a tenore de unu programma de interventos de isvilupu sustenìbile.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta